Qytetarët e Malishevës kanë hasur në një pamje të pazakontë në rrugët e qytetit – gropa të mëdha të mbushura me ujë, të cilat pas reshjeve të fundit janë kthyer në “liqene të përkohshme”.
Ajo që ka filluar si një problem serioz infrastrukturor, tani po shndërrohet në temë të diskutimeve me ngjyrime satirike në opinionin publik, shkruan KosovaNews.
Në një reagim të ironizuar, asambleisti i Kuvendit Komunal të Malishevës, Valon Krasniqi nga Partia Guxo, ka publikuar një video dhe koment ku përshkruan situatën me tone humoristike, duke thënë se gropat tashmë po përdoren për peshkim.
“Falë gropave të thella që zbukurojnë rrugët tona, tani mund të shijojmë kënaqësinë e peshkimit piktoresk mes asfaltit. Kush do ta kishte menduar se një ditë do të shihnim peshkatarë duke hedhur grepat e tyre në ‘liqenet’ e reja të Malishevës?”, shkruan Krasniqi.
Ai vazhdoi duke e cilësuar këtë si një “inovacion të vërtetë”, ndërsa ironizoi më tej duke thënë:
“Malisheva – vendi ku gropat e rrugës janë kthyer në oqean. Peshkimi është bërë sport kombëtar!”
Ky reagim pasqyron zhgënjimin e qytetarëve për mungesën e investimeve në infrastrukturën rrugore dhe për neglizhencën institucionale në mirëmbajtjen e rrugëve publike. Ndërkohë që qytetarët përballen me vështirësi në lëvizje dhe dëme në automjete, duket se reagimet zyrtare mbeten të pakta.
