Ministrja në detyrë e Punëve të Jashtme, Donika Gërvalla tha se për rastin e ndalimit të ish-pjesëtarit të Njësisë Speciale nga autoritetet serbe kanë informuar misionet e huaja edhe në Kosovë edhe në Serbi duke kërkuar ndihmën e tyre.
Gërvalla tha se shpreson që çështja do të qartësohet sot e i njëjti të mos mbahet as 48 orë.
“Ministria e Punëve të Jashtme është interesuar menjëherë pranë organeve serbe për të konstatuar vërtetësinë e informacionit. Kemi informuar edhe në Kosovë edhe në Beograd misionet e huaja diplomatike. Kemi kërkuar ndihmën e tyre, kemi kërkuar qartësi dhe shpresojmë që çështja mundësisht sot të qartësohet e ai të mos mbahet fare për 48 orë”, tha Gëvalla.
Por, kryediplomatja në detyrë u ka bërë thirrje të gjithëve që të kenë kujdes të shtuar tash kur në kohë vere udhëtojnë nga Serbia, meqë thotë se ndalesat arbitrare nga shteti serb, janë shtuar viteve të fundit.
Ajo tha se kujdes të shtuar duhet të kenë, sidomos përfaqësuesit e ish-përfaqësuesit e organeve të sigurisë.
“Më lejoni të bëj edhe njëherë thirrje për një kujdes të veçantë për të gjithë ata që tani po afrohet vera e kalojnë nga Serbia për shkak se rastet e ndalesave arbitrare e të paarsyeshme janë shtuar viteve të fundit, sidomos përfaqësuesit e ish-përfaqësuesit e organeve tona të sigurisë duhet të tregojnë një kujdes të veçantë kur kalojnë nëpër Serbi”, tha ajo.
