Deputeti i Lëvizjes Vetëvendosje, Mefail Bajqinovci, ka shprehur shqetësimin lidhur me mënyrën joligjore të shpërndarjes së faturave nga disa ndërmarrje publike dhe private, përfshirë KESCO-n, Ndërmarrjen Publike Banesore (NPB), Ngrohtoren, Hidrodrinin dhe të tjera.
Sipas tij, këto ndërmarrje po shpërndajnë fatura pa respektuar ligjin për shërbimet postare – disa prej tyre pa zarf fare, ndërsa të tjerat pjesërisht të zarfuara. Kjo praktikë, sipas Bajqinovcit, cenon jo vetëm funksionimin e Postës së Kosovës, që është operatori i vetëm i licencuar për shërbime postare universale, por edhe imazhin e shtetit të Kosovës.
“Është koha e fundit që ARKEP-i dhe institucionet tjera përgjegjëse si ASHMP, ATK dhe organet mbikëqyrëse të ndërmarrin masa konkrete”, deklaroi Bajqinovci.
Ai kërkoi ndërhyrje urgjente nga autoritetet përkatëse për të ndalur këto praktika dhe për të garantuar respektimin e ligjit dhe mbrojtjen e interesit publik.
