Ministri i Administrimit të Pushtetit Lokal, Elbert Krasniqi ka thënë se në Kosovë nuk mund te ketë asociacion një etnik.
Kransiqi në një konferencë për media pas mbledhjes që Qeverisë ka thënë se Kosova është shtet multietnik.
“Kosova është shtet multietnik dhe nuk mund të ketë asociacion një etnik. Çdo gjë që është ndërtuar në Kosovë deri sot është ndërtuar si shtet multientik”, ka thënë ai.
Qeveria e Kosovës nën udhëheqjen e kryeministrit Albin Kurti na vazhdimësi ka kundërshtuar krijimin e një asociacioni në baza etnike.
Sa i përket marrëveshjes për Asociacionin për komunat me shumicë serbe, kryeministri Kurti edhe këto ditë ka theksuar se organizimet që bashkojnë komunat me veçanti gjeografike apo ekonomike janë të nevojshme, por jo ato në bazë të etnisë.
“Modelet, të cilat janë zhvillimore, janë padyshim të nevojshme. Nëse kemi, ta zëmë, komunat e Maleve të Sharrit, ose të Bjeshkëve të Rugovës, ose komunat e Lumit Lepenc, komuna të cilat kanë të bëjnë me veçantinë gjeografike, ekonomike e zhvillimore të komunave, unë jam i interesuar. Por, asociacione sipas kriterit etnik, nuk e kalojnë testin e Kushtetutës së Republikës së Kosovës dhe të parimit universalist demokratik. Nuk e kalojnë. Pra, nuk duhet të bëhet asociacioni i komunave serbe pse kemi këtë identitet etnik, nëse ia duam të mirën këtij vendi. Dhe, kur kihet parasysh që Beogradi – paralelisht me kërkesën për asociacion njëetnik – deklaron se kurrë nuk do ta njohë Kosovën, pasi që masakra e Reçakut kurrë nuk ka ekzistuar – atëherë besoj që nuk ka njeri për të cilin nuk është i qartë konteksti në të cilin jetojmë”, ka thënë Kurti.
E kundër asocioacionit në baza etnike janë pozicionuar edhe Shtetet e Bashkuara të Amerikës (ShBA).
I dërguari i posaçëm i ShBA-së për Ballkanin Perëndimor, Gabriel Escobar, tha se krijimi i Asociacionit të komunave me shumicë serbe nuk duhet të jetë në kundërshtim me Kushtetutën e Kosovës, dhe të krijojë “shtet brenda shtetit”.
Gjatë një bashkëbisedimi me gazetarët që bëri ditë më parë, Escobar tha se qëndrimi i ShBA-së është që të zbatohen të gjitha marrëveshjet e arritura në kuadër të dialogut Kosovë-Serbi, por tha se duhet të ketë diskutim për çështjen e Asociacionit, që të mos bie ndesh me ligjet.
“Ne kemi qenë të qartë se palët janë pajtuar më herët për Asociacionin, prandaj duhet të diskutohet. Megjithatë, Asociacioni nuk duhet të ndërhyjë, nuk duhet të bie në kundërshtim me Kushtetutën e Kosovës, nuk duhet të krijojë probleme në funksionalitetin e Kosovës dhe nuk duhet të jetë shtet brenda një shteti”, deklaroi ai.
Escobar mes tjerash tha se ka modele të shumta evropiane, ku minoritetet mund të mbrojnë trashëgiminë e tyre kulturore dhe gjuhën amtare, por pa shkelur kornizën kushtetuese të vendit ku jetojmë./KosovaNews/
