Një ngjarje e papranueshme ka ndodhur në Prishtinë, ku shkolla private British School of Kosova ka refuzuar regjistrimin e një fëmije me Sindromën Down.
Ky vendim ka shkaktuar një reagim të fuqishëm nga Rrjeti i Prindërve Edukues të Kosovës, i cili ka kërkuar veprime të menjëhershme për të adresuar këtë diskriminim të qartë.
Sipas tyre ky akt është i papranueshëm në një shoqëri që synon të ndërtojë vlera demokratike.
“Kjo qasje diskriminuese dhe përjashtuese është e papranueshme në një shoqëri që synon të ndërtojë vlera demokratike, gjithëpërfshirëse dhe të barabarta për të gjithë qytetarët e saj, veçanërisht për më të vegjlit e saj – fëmijët. Refuzimi i vajzës së vogël, Nisa, për të ndjekur mësimet në një institucion arsimor nuk është vetëm një padrejtësi ndaj një fëmije dhe një familjeje – është një dështim institucional dhe moral që i bën dëm të gjithë shoqërisë”, thuhet në reagim.
Ata kanë kërkuar nga kjo shkollë që të rishqyrtojë menjëherë vendimin e saj, dhe të kërkojë falje publike.
Ndërkoh, babai i fëmijës, Burim Sopa tha se është zhgënjyese që, në vitin 2025, ende ekzistojnë institucione arsimore që nuk ofrojnë mundësi për fëmijët me aftësi të ndryshme.
Ai e ka cilësuar këtë veprim si një dhimbje të thellë që asnjë prind nuk dëshiron ta përjetojë.
“Sot ndjeva një dhembje që si prind nuk do të doja ta përjetoja kurrë. Institucioni British School of Kosova refuzoi regjistrimin e vajzës sime, Nises, vetëm sepse ajo ka Sindromën Down. Është zhgënjyese që në vitin 2025, në një shoqëri që pretendon për përfshirje dhe barazi, ende ekzistojnë institucione arsimore që nuk i hapin dyert për të gjithë fëmijët — pavarësisht potencialit, dëshirës për të mësuar, apo të drejtës që u takon”, tha ai./
