Policia në Shqipëri ka zhvilluar një operacion të gjerë në kuadër të hetimeve për krime zgjedhore, ku janë ushtruar kontrolle fizike dhe në banesat e pesë shtetasve të dyshuar.
Sipas njoftimit të Policisë Shtetit, gjatë këtij operacioni janë sekuestruar një sërë provash materiale, përfshirë fatura, kupona karburanti, lista zgjedhësish, një DVR, një armë manovër dhe pesë telefona celularë.
Operacioni u realizua nga Drejtoria për Hetimin e Krimeve Ekonomike dhe Financiare dhe Drejtoria e Forcës së Posaçme Operacionale në Departamentin e Policisë Kriminale, në bashkëpunim me oficerët e Byrosë Kombëtare të Hetimit (BKH), në funksion të procedimit penal. Kontrollet u ekzekutuan në bazë të vendimit të datës 17 maj 2025, të Gjykatës së Posaçme të Shkallës së Parë për Korrupsionin dhe Krimin e Organizuar.
Gjatë kontrollit të ushtruar ndaj shtetasit E. Rr., 50 vjeç, banues në Kavajë, Policia bllokoi një telefon celular dhe sekuestroi në një ambient në pronësi të tij fatura, kupona nafte dhe lista zgjedhësish.
Ndaj shtetasve O. S., 38 vjeç, dhe T. Rr., 44 vjeç, të dy banues në Kavajë, si dhe T. H., 35 vjeç, banues në Qerret, Durrës, u sekuestruan gjithashtu telefona celularë.
Ndërkohë, shtetasit M. S., 37 vjeç, banues në Kavajë, iu sekuestruan një pajisje DVR, kupona nafte dhe një armë manovër.
Të pesë këta shtetas dyshohen për veprën penale të korrupsionit aktiv në zgjedhje. Hetimet në kuadër të këtij procedimi penal vijojnë me qëllim dokumentimin e plotë të veprimtarisë së paligjshme.
Policia e Shtetit vijon punën për garantimin e integritetit të proceseve zgjedhore dhe sjelljen përpara drejtësisë të çdo shtetasi të përfshirë në veprimtari të paligjshme.
