Kryetari i Lidhjes Demokratike të Kosovës (LDK), Lumir Abdixhiku, ka pritur sot në Selinë Qendrore të partisë ambasadorin e Suedisë në Kosovë, z. Jonas Westerlund, me të cilin ka zhvilluar një takim për të diskutuar mbi zhvillimet e fundit politike në vend dhe krizën institucionale që po e përballon Kosova.
Në këtë takim, kryetari Abdixhiku e informoi ambasadorin Westerlund për qëndrimet e LDK-së lidhur me situatën aktuale dhe për propozimin konkret të kësaj partie për krijimin e një Qeverie Nacionale të Tranzicionit, të cilën e cilësoi si një zgjidhje të përkohshme, të përgjegjshme dhe të nevojshme për të tejkaluar bllokadën institucionale dhe për t’iu ofruar qytetarëve një zgjidhje funksionale ndaj problemeve të përditshme.
Abdixhiku theksoi se bllokada institucionale, e cila ka çuar në dështimin e mbledhjeve të Kuvendit për të 15-tën herë radhazi, është e papranueshme dhe po ndikon drejtpërdrejt në jetën e qytetarëve, duke minuar funksionalitetin e shtetit dhe besimin në institucionet publike.
“Zgjatja e kësaj situate po rëndon jetesën e përditshme dhe po e bën shtetin jofunksional. Propozimi ynë është një rrugëdalje e arsyeshme që mund të rikthejë stabilitetin dhe të hapë rrugën për zgjedhje të lira dhe të drejta në një ambient të qetë institucional,” tha Abdixhiku.
Në takim u trajtuan edhe çështje të bashkëpunimit bilateral, ku kryetari Abdixhiku shprehu mirënjohjen e tij për mbështetjen e vazhdueshme që Suedia ka dhënë dhe po jep për Kosovën në proceset demokratike dhe zhvillimore.
Abdixhiku e falënderoi ambasadorin Westerlund për mbështetjen e vazhdueshme që Suedia i ka dhënë Kosovës gjatë proceseve të saj.
