Pas mesnatës së djeshme, u raportua për humbjen e katër motoçiklistëve nga Theranda. Ndërkaq, Gjatë ditës së sotme, Shoqata e Kërkim-Shpëtimit njoftoi për gjetjen e tyre, duke deklaruar se motoristët nga Suhareka që kishin humbur rrugën, ishin lokalizuar me ndihmën e ekipeve të kërkim-shpëtimit.
Por, ky version është kundërshtuar nga motoçiklistët e Suharekës, Valon Zeqiraj, Meriton Rexhaj dhe Agron Kelmendi, të cilët kanë dhënë një sqarim ndryshe për ngjarjen, raporton KosovaNews.
Sipas tyre, personat e humbur nuk ishin motoristë nga Suhareka, por turistë nga Prishtina. Ata theksojnë se Policia e Kosovës kërkoi ndihmën e tyre për të ndërhyrë në një zonë ku automjetet e zakonshme nuk mund të qaseshin për shkak të terrenit të vështirë malor.
“Pas marrjes së kërkesës për ndihmë nga Policia, ekipet tona u mobilizuan menjëherë dhe nisën kërkimin në zonën ku turistët ishin parë për herë të fundit,” thuhet në reagimin e klubit, shkruan KosovaNews.
Për të dëshmuar përfshirjen e tyre në këtë operacion, motoçiklistët Valon Zeqiraj, Meriton Rexhaj dhe Agron Kelmendi, kanë publikuar video dhe fotografi të realizuara gjatë kërkimit, si dhe fotografi duke pirë kafe me turistët e humbur, pasi që i kishin gjetur, duke dokumentuar terrenin dhe procesin e lokalizimit të turistëve.
Të gjithë personat e kërkuar janë gjetur dhe ndodhen në gjendje të mirë shëndetësore.
Shoqata e Kërkim-Shpëtimit dhe Policia e Kosovës nuk kanë komentuar ende lidhur me sqarimet e dhëna motoçiklistët, Valon Zeqiraj, Meriton Rexhaj dhe Agron Kelmendi./KosovaNews/
