Ish-drejtori i Policisë së Kosovës, Reshat Maliqi i është kthyer mbrapa momentit kur ishte shkarkuar nga pozita e drejtorit në vitin 2011, në atë kohë nga kryeministri Hashim Thaçi.
Reshat Maliqi në Kallxo Përnime rrëfeu momentin kur kishte kuptuar shkarkimin e tij, që thotë se e kishte marrë nga lajmet në televizion.
“Me një fqinjin timin kam qenë duke pirë kafe, kur vajza ime më ka thirrë në telefon prej Ferizajt, më ka thënë “ku je”, i thash qe në terrasë po pikafe, tha “po shkruan në televizion që je shkarku prej pozitës”, thash mos është ndonjë emision humoristik, “tha jo jo s’po ndalet”. Atëherë kam shkuar në banesë. Kur shkova në banesë, vetëm mediat depërtuan dhe më thirrën, më pyetën, i thash jam në banesë duke pirë kafe me familje, thash po e përcjelli edhe unë situatën. Por nuk kisha asnjë informim zyrtar”, rrëfen Maliqi.
Tutje, Maliqi ka thënë se e ka telefonuar ministrin e Brendshëm në atë kohë, Bajram Rexhepin, i cili, sipas tij, i ka thënë se nuk di asgjë për shkarkimin.
“Unë e kam parë përmes televizionit, pastaj e kam thirrë ministrin Bajram Rexhepin, të ndjerin, tha “unë nuk di asgjë”. Mu ka dokë e pamundur që ai nuk ka ditë asgjë, sepse më vonë e kam vërtetuar se ai e ka ditur çdo send dhe kanë qenë bashkë me kryeministrin në atë moment, por nuk e di arsyen, sepse unë nuk kam qenë ndonjë person i rrezikshëm që e kam rrezikuar ose e kam fy atë, ose e kisha përdorë ndonjë fjalor të rëndë ndaj tij. Kryeministri e ka pasur të drejtën dhe e ka të drejtën për emërimin e drejtorit, por nuk e ka të drejtën e shkarkimit. Çështja e shkarkimit të drejtorit rregullohet me ligj të Policisë. Ndaj meje nuk është zhvilluar asnjë procedurë as disiplinore e as procedurë penale”, ka thënë Maliqi.
Reshat Maliqi ishte emëruar drejtor i Policisë në vitin 2011, por më pas ishte shkarkuar me vendim të kryeminsitrit në atë kohë Hashim Thaçit. Gjykata vite më vonë kishte konstatuar se shkarkimi i tij ka qenë i kundërligjshëm.
Në intervistë ish koloneli Maliqi flet për ndikimin politik në Policinë e Kosovës, e luftimin e kontrabandës në veri të vendit.
Reshat Maliqi po ashtu flet edhe për aksionin policor të vitit 2011 në veri, gjatë së cilit u vra polici Enver Zymberi, e shkarkimin e tij nga pozita e drejtorit me vendim të ish kryeministrit Hashim Thaçi.
Në këtë intervistë Maliqi flet edhe për procesin e Vettingut në Policinë e Kosovës e testimin e policëve me testin e poligrafit.
