Legjislatura e nëntë e Kuvendit të Kosovës sot do të bëjë përpjekjen e radhës për t’u konstituar. Të mërkurën në mungesë kuorumi, dështoi përpjekja për zgjedhjen e komisionit për votimin e fshehtë, duke e detyruar kryesuesin Avni Dehari që ta ndërpresë seancën, dhe paralajmëruar se ajo do të vazhdojë sot në orën 10:00.
Kryesuesi i seancës, Avni Dehari, edhe të mërkurën u bëri thirrje partive politike që të propozojnë anëtarë për komisionin për votimin e fshehtë, si një hap procedural kyç sipas tij, për vazhdimin e procesit.
Por, PDK-ja, LDK-ja, AAK-NISMA dhe Lista Serbe nuk propozuan kandidatë për komisionin, duke mbajtur qëndrimin e njëjtë si në seancat e kaluara
Më pas përbërja e komisionit, me anëtarët e propozuar në vazhdimet e kaluara të seancës, u hodh në votim.
Kryesuesi Dehari konstatoi se 56 deputetë kanë votuar për, një kundër, ndërsa nuk kishte asnjë abstenim.
Ndërkohë, presidentja e Republikës së Kosovës, Vjosa Osmani, ka shprehë gatishmërinë, që t`i presë liderët e partive politike në rast se ata e shohin të nevojshme një gjë të tillë.
“Deri dje nuk kemi pasur një kërkesë të tillë. Tani që disa parti kanë kërkuar që Presidentja t’i thërrasë në takim të përbashkët të liderëve, Kabineti i Presidentes do të kontaktojë së shpejti me partitë politike për të parë se cila është koha e përshtatshme për të gjithë, për një takim të tillë gjithëpërfshirës”, tha Bekim Kupina, këshilltar për Media.
