Tentativa e radhës për konstituimin e Kuvendit do të vazhdojë ditën e mërkurë, duke filluar nga ora 10:00. Kjo përpjekje është e 12-ta me radhë për zgjedhjen e kryetarit të Kuvendit dhe nënkryetarëve.
Procesi po zvarritet, pasi partia fituese e zgjedhjeve LVV nuk ka arritur të sigurojë votat e mjaftueshme për kandidatin e propozuar për kryetar të Kuvendit, Albulena Haxhiu.
Për të zgjidhur këtë ngërç, të hënën, kryeministri në detyrë, Albin Kurti, ka dërguar një letër kryetarit të LDK-së, Lumir Abdixhiku, ku ka shprehur gatishmërinë e tij për një koalicion midis LVV dhe LDK.
“Ne edhe mund të shkojmë në zgjedhje të reja ku pak çka mund të ndryshojë për LDK-në dhe mandej sërish do të na duhet të ulemi bashkë për koalicionin LVV-LDK”, shkruan Kurti, duke shtuar se një qasje e tillë vetëm sa do ta vononte formimin e institucioneve.
Ndërkohë, LVV është në pritje të një përgjigje, por nga LDK ende nuk është shprehur asnjë qëndrim.
Megjithatë, Lumir Abdixhiku ka deklaruar se përgjigjja do të jepet me seriozitet dhe në kohën e duhur.
“Qëndrimet e Lidhjes Demokratike të Kosovës tashmë ju i dini”, ka pohuar Abdixhiku.
Ndryshe, LVV në zgjedhjet e 9 shkurtit është radhitur e para, ndërsa LDK e treta.\ Telegrafi
