Në sheshin “Zahir Pajaziti” në Prishtinë, u shënua Dita Ndërkombëtare e Zjarrfikësve. Me këtë rast, zjarrfikësit e kryeqytetit prezantuan para qytetarëve pajisjet dhe aktivitetet e tyre të përditshme, në një ngjarje simbolike për të shprehur mirënjohje për punën dhe guximin e tyre të përhershëm.
Në zemër të kryeqytetit, në sheshin “Zahir Pajaziti” u zhvillua një ekspozitë e veçantë. Zjarrfikësit e Prishtinës prezantuan pajisjet e përdorura në përballje me flakët, shpëtimit nga aksidentet dhe emergjencat e natyrës. Vizitorët, përfshirë edhe më të vegjlit, patën mundësinë të njihen nga afër me pajisjet për shpëtim, mbrojtje personale dhe ndërhyrje në situata të rënda.
“Zjarrfikësit tanë janë 24 orë në 365 ditë të gatshëm që t’i ndihmojnë qytetit tonë, qytetarëve dhe vendit tonë. Ne, si kryeqytet kemi bërë investime të shumta tash, p.sh. mendojmë që zjarrfikësit tanë që të jenë sa të më gatshëm duhet edhe ne duhet të mbrojmë mirëqenien e tyre. Në buxhetin tonë kemi buxhetuar edhe për pajisje të reja si kamion dhe pajisje të tjera shtesë për të mirën e tyre. Kërkoj që të kemi iniciativë shtesë nga niveli qendror, për zjarrfikës të ri. Janë 26 të ri shtesë por mungojnë edhe 44 tjerë”, tha Përparim Rama, kryetar i Komunës së Prishtinës.
Për drejtorin e Brigadës së Zjarrfikësve në Prishtinë, Malë Gashi, kjo ditë është një moment për të nderuar jo vetëm ata që humbën jetën në krye të detyrës, por edhe për të vlerësuar sakrificën e përditshme të zjarrfikësve kudo në botë.
“Është ditë për të përkujtuar dhe për të nderuar të gjithë zjarrfikësit anembanë botës që kanë humbur jetën në kryerjen e detyrave, mirëpo kjo nuk është për të nderuar vetëm ata. është edhe për të nderuar sakrificën e përditshme që e japin zjarrfikësit kudo që janë. Sigurisht që mund të bëhet më shumë por ky shërbim do ta arrijë vendin e vet, investimi në këtë shërbim ka të bëjë për ruajtjen e njerëzve”, tha ai.
Ky organizim u bë në Ditën Ndërkombëtare të Zjarrfikësve, që shënohet çdo vit më 4 maj dhe është një ditë për të nderuar zjarrfikësit në mbarë botën që nga viti 1999, pas një ngjarjeje tragjike në Linton të Australisë, ku pesë zjarrfikës humbën jetën gjatë përpjekjeve për të shuar një zjarr të madh pyjor.
