Lëvizja Vetëvendosje, e cila korri fitore të madhe në zgjedhjet e fundit parlamentare dhe tashmë drejton institucionet e vendit, ka thënë se Qeveria deri në korrik të vitit 2022 ka ndërmarrë një sërë veprime e masa për të përmbushur qëllimin që ka për punë dhe drejtësi.
Nga ky subjekt janë dhënë me shifra e detaje të renditura në tabela, milionat që janë investuar në projekte të mëdha.
“Krahas punës dhe drejtësisë shtylla tjetër e punës së qeverisë janë projektet e mëdha në bashkërendim edhe me organizmat ndërkombëtarë në fushat prioritare për ekonominë e vendit.”, thuhet në njoftimin e Vetëvendosjes, ndërsa janë radhitur projektet e mëdha ku janë investuar me qindra miliona euro.
Tutje Vetëvendosje thotë se gjithë këtgo masa u morën për përmbushjen e qëllimit për punë e drejtësi dhe tekson se ritmi i punëve të tilla do të intensifikohet edhe më shumë nga vjeshta e këtij viti.
“Puna dhe drejtësia nuk janë vetëm kërkesa legjitime të qytetarëve por edhe shtylla të progresit të përgjithshëm shoqëror. Puna nuk është vetëm vendi i punës por edhe mundësia për të mësuar dhe bërë përvojën e parë në jetë. Ndaj për këtë qeveria jonë ka bërë programe. Drejtësia është ajo e ligjit por mbi të gjitha është ajo shoqërore. Andaj, Qeveria jonë është duke u përpjekur për drejtësinë penale, atë civile por mbi të gjitha edhe me atë shoqërore ku shtresat në nevojë përkrahen. Këto janë vetëm një pjesë e projekteve dhe planeve të nisura nga Qeveria dhe që do të shtohen e dinamizohen në vjeshtën e këtij viti dhe do të planifikohen për Buxhetin e ri 2023”, është thënë nga Lëvizja Vetëvendosje në Facebook.
