Shoqata Sindikale e Anëtarëve të Shërbimit të Jashtëm të Republikës së Kosovës ka mbajtur mbledhjen e Kuvendit, me rastin e përfundimit të mandatit të Këshillit Ekzekutiv.
Në këtë mbledhje është zgjedhur kryesia e re e shoqatës, ndërsa me shumicë votash, për kryetar është zgjedhur Fatmir Haxholli.
Zgjedhja e kryesisë së re vjen në një moment të rëndësishëm për strukturimin dhe fuqizimin e mëtejshëm të rolit të sindikatës brenda Shërbimit të Jashtëm të Kosovës.
Anëtarët e Kuvendit u dakorduan për vazhdimin e aktivitetit sindikal, me synim forcimin e integritetit, promovimin e meritokracisë dhe përmirësimin e kushteve të punës për zyrtarët e Ministrisë së Punëve të Jashtme dhe Diasporës.
Shoqata thekson se do të angazhohet për një trajtim dinjitoz dhe të barabartë të të gjithë anëtarëve të shërbimit të jashtëm, duke garantuar transparencë të plotë dhe përfshirje publike në të gjitha veprimtaritë e saj.
Shoqata Sindikale e Anëtarëve të Shërbimit të Jashtëm të Republikës së Kosovës mbetet e përkushtuar në përfaqësimin e interesave të punonjësve dhe në forcimin e zërit të tyre në institucionet relevante.
