Shtetet e Bashkuara do të paraqesin një propozim për njohjen e aneksimit të Krimesë nga Rusia dhe ngrirjen e zonës së luftimit, si pjesë e një marrëveshjeje paqeje gjatë bisedimeve në Londër, që synojnë të diskutojnë hapat drejt një armëpushimi në luftën ruso-ukrainase.
Burimet i thanë Washington Post se propozimet e SHBA-së të paraqitura Ukrainës në Paris javën e kaluar, përfshijnë njohjen zyrtare nga Uashingtoni të Krimesë së aneksuar si territor rus dhe heqjen e sanksioneve kundër Rusisë, si pjesë e një marrëveshjeje të ardhshme.
Në këmbim të kësaj, SHBA beson se Moska duhet të ndërpresë operacionet ushtarake në Ukrainë, shkruan Washington Post.
Një këshilltar i paidentifikuar i presidentit ukrainas Volodymyr Zelensky vuri në dukje se propozimet e SHBA përmbajnë disa ide me të cilat Kievi pajtohet, dhe të tjerat që nuk janë.
Një zyrtar perëndimor e përshkroi sasinë e presionit ndaj Ukrainës nga SHBA-ja, si “jashtëzakonshme”, transmeton Telegrafi.
Një zëdhënës i Departamentit të Shtetit të SHBA-së mohoi se Uashingtoni po i paraqiste Kievit një fakt të kryer. Megjithatë, artikulli vëren se pakënaqësia në rritje e administratës Trump me ritmin e negociatave, ka bërë që Kievi të frikësohet nga një ndryshim i ri në marrëdhëniet me Uashingtonin.
Të dërguarit nga Franca, Britania e Madhe dhe Gjermania pritet të këmbëngulin që çdo marrëveshje të përfshijë garanci sigurie dhe programe të rimëkëmbjes pas luftës, ndoshta të financuara pjesërisht nga të ardhurat nga asetet e ngrira ruse.
Privatisht, zyrtarët evropianë dhe ukrainas kanë pranuar se Kievi nuk ka gjasa të rimarrë kontrollin e territorit të kontrolluar nga Rusia së shpejti.
Në rastin më të mirë, ata synojnë të vonojnë çdo marrëveshje paqeje që do t’i lejonte Moskës të ruajë tokën që ka pushtuar, duke siguruar një fund të sanksioneve.
Javën e kaluar, gjatë bisedimeve në Paris, Shtetet e Bashkuara i paraqitën Ukrainës një përmbledhje të propozimeve të saj, të cilat ukrainasit e konsideruan si përpjekjen përfundimtare të Uashingtonit përpara se të konsideronte braktisjen e procesit të paqes, sipas dy burimeve.
Propozimi i SHBA-së në Paris, i cili përfshin njohjen e Krimesë si ruse, pason një vizitë të Steve Witkoff, i dërguari special i presidentit amerikan Donald Trump për Lindjen e Mesme, në Moskë këtë muaj, ku ai zhvilloi një takim disa-orësh me liderin rus Vladimir Putin.
Një person i informuar mbi propozimin e përshkroi atë si “ide të Witkoff” që Shtetet e Bashkuara të njohin Krimenë si ruse, “pa detyruar Ukrainën ta njohë atë”.
Departamenti Amerikan i Shtetit nuk pranoi të komentojë mbi propozimet specifike të paraqitura tek negociatorët.
“I vetmi dokument i ndarë në Paris ishte një listë e opsioneve të mundshme për diskutim dhe reagime”, tha një zyrtar.
Javët e fundit, liderët evropianë janë përfshirë në mënyrë më aktive në bisedimet e paqes, duke shënuar një përmirësim në krahasim me diskutimet fillestare të ekipit Trump me rusët në Arabinë Saudite, ku nuk përfshiheshin as ukrainasit.
Tani, Londra dhe aleatët e tjerë do të kërkojnë mënyra për të përdorur ndikimin e tyre në favor të Ukrainës.
Siç vë në dukje WP, Evropa ka disa leva, duke përfshirë miliarda në asete ruse të konfiskuara ose të ngrira që mund të kthehen ose të përdoren për të financuar programet e rimëkëmbjes së pasluftës.
