Gjermania dhe Britania e Madhe i dërguan një mesazh Rusisë se Ukraina do të jetë në gjendje të vazhdojë të luftojë falë ndihmës perëndimore.
Këto vende evropiane kryesonin për herë të parë një takim të të ashtuquajturit Grupi Ramstein, i përbërë nga rreth 50 vende që ofrojnë ndihmë ushtarake për Ukrainën.
Sipas tyre, presidenti rus nuk tregon asnjë shenjë gatishmërie për paqe.
Bëhet e ditur se SHBA ia dorëzoi presidencën e takimit në selinë e NATO-s në Bruksel Britanisë dhe Gjermanisë, të cilat njoftuan ndihmë ushtarake shtesë nga aleatët për Ukrainën në shumën prej 21 miliardë euro.
Në të njëjtën kohë, Steve Witkoff, i dërguari special i Trumpit, ndodhet në Rusi dhe mund të takohet me presidentin Vladimir Putin, shkruan Reuters, përcjell Telegrafi.
“Duke pasur parasysh se agresioni i Rusisë kundër Ukrainës vazhdon, ne duhet të pranojmë se paqja në Ukrainë duket e paarritshme në të ardhmen e afërt”, tha ministri gjerman i Mbrojtjes Boris Pistorius.
Si Pistorius ashtu edhe sekretari britanik i mbrojtjes John Healey po kërkojnë të sigurojnë Ukrainën se ndihma ushtarake perëndimore do të zgjasë.
“Ne do të sigurojmë që Ukraina të vazhdojë të përfitojë nga ndihma jonë e përbashkët ushtarake. Rusia duhet të kuptojë se Ukraina është në gjendje të vazhdojë të luftojë, ne do ta mbështesim atë. Ukraina mund të llogarisë tek ne”, tha Pistorius.
Raportohet se Healey e përshkroi vitin 2025 si një vit vendimtar në luftën e Ukrainës kundër pushtimit rus.
“Tani jemi në një moment vendimtar të luftës dhe i themi Ukrainës: ne jemi pranë jush në këtë luftë dhe do t’ju qëndrojmë në paqe”, tha ministri britanik.
Ndërkohë, Sekretari amerikan i Mbrojtjes Pete Hegseth mori pjesë virtualisht në takim.
“Gjëja më e rëndësishme është që ai të marrë pjesë në takim”, tha Pistorius, duke pranuar se ishte e paqartë se çfarë drejtimi do të merrte pjesëmarrja dhe mbështetja amerikane.
Presidenti ukrainas Volodymyr Zelensky gjithashtu iu bashkua takimit përmes lidhjes video.
Ndryshe, Grupi i Kontaktit të Mbrojtjes së Ukrainës, i krijuar gjatë administratës së Joe Biden, koordinon ndihmën ushtarake për Ukrainën.
Administrata Trump është distancuar nga grupi dhe po u bën presion të dyja palëve që të bien dakord për një armëpushim.
Në takim, Gjermania u zotua për ndihmë që përfshin sistemin e mbrojtjes IRIS-T me rreth 300 raketa dhe Britania së bashku me Norvegjinë do të financojë sistemet e radarëve, minat antitank dhe qindra mijëra dronë.
IRIS-T përdoret për të mbrojtur zonat e banuara, ndërtesat dhe objektet.
Mund të përdoret në luftën kundër dronëve, aeroplanëve, helikopterëve dhe raketave të lundrimit, në një distancë deri në 40 kilometra dhe në një lartësi deri në 20 kilometra.
Duke pasur parasysh saktësinë e tij të lartë të përgjimit, ai deri më tani ka luajtur një rol kyç në strategjinë e mbrojtjes ajrore të Ukrainës
