Drejtori i Inspektoratit për Trashëgimi Kulturore në kuadër të Ministrisë së Kulturës, Rinisë dhe Sportit, Imer Hakaj në një konferencë për media sot, ka bërë të ditur se kërkesa e tij për dorëheqje nga kjo pozitë ka ardhur si rezultat i presioneve.
Ai ka fajësuar kryetarin e Prishtinës, Përparim Rama për presione ndaj tij.
“Kërkesa ime zyrtare për largim nga pozita e drejtorit të inspektoratit ka qenë si shkak i presionit dhe tejkalimit të kompetencës së kryetarit të komunës Përparim Rama, drejtorëve kompetent ndaj inspektorit të trashëgimisë kulturore. Me ligjin për inspektime, drejtori i inspektoratit është përgjegjës për çdo tejkalim, shkelje të ligjit”, ka deklaruar Hakaj.
Hakaj tha se asnjë prej nesh nuk bartë mesazhe politike, por vetëm mesazhe ligjore.
Kërkesa e tij për dorëheqje ka ardhur pasi Komuna e Prishtinës ka bërë kallëzim penal ndaj tij në lidhje me bllokimin e punimeve në sheshin “Xhorxh Bush”.
