Presidenti amerikan, Donald Trump, tha se është gati të vendosë tarifa të reja prej 50% ndaj Kinës. Kjo pas detyrimeve hakmarrëse të Pekinit të shpallura javën e kaluar, duke përshkallëzuar më tej luftën tregtare globale që ka tronditur tregjet.
Ai tha se tarifat shtesë do të hyjnë në fuqi në mesjavë nëse Kina nuk e heq tarifën e saj hakmarrëse prej 34% deri të martën, raporton CNN.
Trump, gjithashtu, tha se takimet që Kina kishte kërkuar do të anuloheshin, megjithatë ai shtoi se vendet e tjera do të fillonin negociatat për tregtinë menjëherë.
“Dje, Kina lëshoi tarifa hakmarrëse prej 34%, në krye të tarifave të tyre tashmë rekord, tarifave jomonetare, subvencionimit të paligjshëm të kompanive dhe manipulimit masiv afatgjatë të monedhës, pavarësisht paralajmërimit tim se çdo vend që hakmerret kundër SHBA-së duke lëshuar tarifa shtesë me afat të gjatë dhe përtej tarifave tona, do të jetë tashmë abuzimi afatgjatë i tarifave tona ekzistuese. Prandaj, nëse Kina nuk e tërheq rritjen e saj prej 34% mbi abuzimet e tyre tashmë afatgjata tregtare deri nesër, 8 Prill 2025, Shtetet e Bashkuara do të vendosin tarifa shtesë 50% ndaj Kinës, duke filluar nga 9 Prilli”, ka shkruar Trump.
Që nga kthimi në pushtet në janar, Trump kishte vendosur tashmë dy këste prej 10% shtesë për të gjitha importet kineze, për të cilat Shtëpia e Bardhë tha se ishin të nevojshme për të frenuar rrjedhën e paligjshme të fentanilit nga vendi në SHBA.
