Serbia është e interesuar që ta mbaj situatën e tensionuar në Kosovë, por nuk është në interes të vendit tonë që elemente destabilizuese të lëvizin lirshëm në territorin e saj.
Kështu ka deklaruar për KosovaPress, drejtori ekzekutiv i Qendrës Kosovare për Studime të Sigurisë (QKSS), Mentor Vrajolli pas arrestimeve që ndodhën këtë fundjavë të paraqitur si pelegrinë serbë në Gjakovë dhe Prizren.
Vrajolli theksoi po ashtu se “potenciali që Serbia t’i përdorë këto elemente destabilizuese nw Kosovw ka qenë dhe mbetet”.
Ai bën thirrje tek institucionet kosovare për ngritje të vigjilencës ndaj çdo lëvizje nga shteti serb.
Megjithatë, drejtori ekzekutiv i QKSS-së, Mentor Vrajolli konsideron se me kontrollin rigoroz të kufirit Kosovë-Serbi qoftë nga pjesëtarët e Policisë së Kosovës, por edhe KFOR-it dhe NATO-Së gjasat për një eskalim të përgjithshëm të konfliktit është e vogël.
Në mbledhjen e Këshillit të Sigurisë sipas Zyrës së Kryeministrit Serbia “po ndërhyn te disa prej deputetëve të komuniteteve joshumicë e joserbë, që ta sabotojë themelimin e institucioneve të reja të legjislaturës së nëntë.
Sipas Vrajollit në këtë aspekt formimi i institucioneve të reja është në dorën e partive politike në vend. Por, shton se edhe pakicat duhet të bashkohen të gjejnë zgjidhje për formim të qeverisë së re.
16 persona të ndarë në katër automjete me targa të Kragujevcit të Serbisë u arrestuan të shtunën dhe të dielën në Gjakovë dhe Prizren. Kështu bëri të ditur ministri në detyrë i Punëve të Brendshme, Xhelal Sveçla mbrëmë, i cili tha se katër prej tyre rezultuan të jenë oficerë aktivë të shërbimeve të sigurisë së Serbisë.
Sipas Sveçlës njëri nga të arrestuarit është i afërt me të dyshuarin kryesor për vrasjen e rreshterit policor të Kosovës, Afrim Bunjaku.
E me kërkesë të kryeministrit në detyrë, Albin Kurti dje u mbajt një mbledhje e Këshillit të Sigurisë.
Prokurori Themelore në Gjakovë ka kërkuar caktimin e masës së paraburgimit prej 30 ditësh ndaj katër të pandehurve me inicialet B.R., N.V., P.K., M.S., të nacionalitetit serb, të cilët dyshohen për veprën penale armëmbajtje pa leje.
Aktualisht në Gjykatën Themelore në Gjakovë është duke u mbajtur seanca për caktimin e masës së sigurisë.
