Dhjetëra mijëra njerëz kanë dalë në rrugët e shumë qyteteve të Shteteve të Bashkuara të Amerikës për të protestuar kundër politikave të ndjekura nga Presidenti Donald Trump dhe Elon Musk, kreu i Departamentit të Eficiencës Qeveritare (DOGE), transmeton KosovaNews.
Reagimet ndaj Presidentit Donald Trump dhe Elon Musk, i cili drejton Departamentin e Eficiencës Qeveritare (DOGE) në SHBA, po vazhdojnë të rriten.
Në mbarë vendin, me moton “Hiqni duart tuaja”, janë organizuar protesta masive, ku vetëm në kryeqytetin Washington dhe në New York kanë marrë pjesë dhjetëra mijëra qytetarë.
Në parkun e Monumentit të Washingtonit, mijëra protestues të mbledhur mbanin në duar flamuj amerikanë, pankarta dhe parulla, duke shprehur zemërimin e tyre ndaj politikave të administratës Trump.
“Hiqni duart nga demokracia”, “Shkarkoni Trumpin”, “Elon Musk, je tradhtar”, “Dëboni urrejtjen”, ishin disa nga mesazhet e protestuesve drejtuar administratës Trump dhe zbatimeve të Departamentit të Eficiencës Qeveritare (DOGE) nën drejtimin e miliarderit Elon Musk.
Edhe në New York, pavarësisht shiut të rrëmbyeshëm, mijëra protestues mbushën sheshet, kryesisht në Bryant Park dhe në pika të tjera të qytetit, duke kundërshtuar administratën Trump.
Protestat ishin gjithashtu të drejtuara kundër politikave të miliarderit Elon Musk, të cilit Trump i ka besuar drejtimin e Departamentit të Eficiencës Qeveritare (DOGE).
Raportohet se numri i protestuesve në New York ka arritur në rreth 10 mijë.
Mediat amerikane shkruajnë se në mbarë vendin janë organizuar mbi 1200 protesta në më shumë se 150 grupe të ndryshme.
Duke vënë në dukje rreth 600 mijë aplikime për pjesëmarrje, mediat theksojnë se këto protesta janë më të mëdhatë e organizuara deri më tani gjatë mandatit të dytë presidencial të Trumpit./KosovaNews!/
