Sekretari amerikan i Thesarit, Scott Bessent ka akuzuar presidentin ukrainas Volodymyr Zelensky për prishjen e marrëveshjes SHBA-Ukrainë për mineralet, duke e quajtur atë “marrëveshjen më të lehtë në botë”.
Në një intervistë me gazetarin Tucker Carlson, të publikuar në rrjetin social X, Bessent deklaroi se “Zelensky ka gënjyer tre herë administratën e presidentit Donald Trump për gatishmërinë e tij për të nënshkruar marrëveshjen”.
Sipas Bessent, Zelensky fillimisht refuzoi të nënshkruante dokumentet gjatë një konference në Mynih, më pas më 28 shkurt pati një mosmarrëveshje në Zyrën Ovale dhe më në fund më 28 mars ai hodhi poshtë projekt-marrëveshjen, duke pretenduar se ishte ndryshe nga versionet e mëparshme.
Bessent tha se presidenti ukrainas kishte krijuar një “hendek të madhësisë së Kanionit të Madh” duke e bërë këtë, duke shtuar se Zelensky mund t’i kishte bërë komentet e tij gjatë një darke private në Uashington.
Bessent kritikoi gjithashtu Zelenskyn, duke e përshkruar atë si “një artist që ishte një hero në kohën e tij, por tani ai ka ngecur”, duke shtuar se udhëheqësi ukrainas po dëgjon “këshilla jo shumë të mira” nga rrethi i tij i ngushtë.
Ndryshe, marrëveshja për tokat e rralla shihet si vendimtare për reduktimin e varësisë së SHBA-së nga mineralet kineze.
Megjithatë, negociatat kanë ngecur për shkak të mosmarrëveshjeve mbi kushtet e marrëveshjes, duke përfshirë garancitë e sigurisë për Ukrainën që nuk ishin përfshirë në draftin origjinal.
Trump ka paralajmëruar Zelenskyn se refuzimi i marrëveshjes mund të çojë në “probleme të mëdha”.
