Byroja Kombëtare për Luftën kundër Korrupsionit të Ukrainës (NABU) dhe Zyra e Prokurorit të Specializuar për Luftën kundër Korrupsionit (SAPO) zbuluan një keqpërdorim prej 733 milionë grivnash ukrainase (16,5 milionë euro) gjatë blerjes së ushqimit për ushtrinë ukrainase.
Në këtë aferë janë të dyshuar ish-drejtori i Ministrisë së Mbrojtjes, pronari i kompanive furnizuese, dy drejtorët e kompanive dhe një person tjetër. Ata akuzohen për keqpërdorimin e fondeve shtetërore gjatë pushtimit të plotë të Rusisë, raporton pravda.
Hetuesit zbuluan se gjatë viteve 2022 dhe 2023, stoqet e ushqimit për ushtrinë ishin shpërndarë përmes “kompletimeve ushqimore” të përzgjedhura nga një katalog prej 409 artikujsh.
Megjithatë, vetëm 10 për qind e këtyre produkteve – si perimet, drithërat, mishi dhe uji – ishin porositur rregullisht.
Pjesa tjetër, duke përfshirë erëza, xhelatinë ose fruta të pyllit, porositeshin rrallë ose aspak për shkak të natyrës së tyre sezonale. Vezët kushtonin 0,37 euro për copë.
“Ky sistem i mundësoi furnizuesve të manipulonin çmimet – duke fryrë çmimet e produkteve me kërkesë të lartë, ndërkohë që ulën çmimet për produktet e papopullarizuara ose sezonale (siç janë qershitë ose kajsitë). Në shikim të parë nuk kishte shkelje pasi çmimi total i kompletit mbeti i pandryshuar. Megjithatë, patatet, të shpërndara në mijëra tonë, kishin një kosto të lartë, ndërsa frutat sezonale, të cilat ishin porositur rrallë, kishin çmim shumë të ulët”, thuhet në njoftimin e NABU.
Një analizë e specializuar konfirmoi se dy kompani të njëjtit pronar fituan ilegalisht 16,5 milionë euro, shkruan index.hr.
Një pjesë e fondeve u ridrejtua nën maskën e dividendëve dhe ndihmës financiare për kompanitë e lidhura. Hetuesit dyshojnë se paratë u përdorën për blerjen e një hoteli në Kroaci dhe pasuri të tjera.
Pas raportimeve të përhapura mediatike, përfshirë ato për vezët që kushtonin 17 grivna ukrainase (0,37 euro) për copë, të dyshuarit ulën çmimet për 11 produktet më të kërkuara.
