I dyshuari nga Peja që u arrestua nën dyshimin për ngacmimin e ish të dashurës rrezikon të përfundojë në paraburgim, pasi Prokuroria Themelore në Ferizaj, tashmë ka ushtruar kërkesën për caktimin e masës së sigurisë. Ai u kap në fundjavë pas denoncimit të viktimës, e cila kërkoi ndihmën e Policisë si pasojë e shqetësimit që i njëjti ia ka shkaktuar.
Ndaj tij është kërkuar masa e paraburgimit në afat prej 30 ditësh për shkak të dyshimit të veprës penale “Ngacmimi”.
Mësohet se personi i dyshuar është K.S. rreth 32-vjeçar.
Sipas dosjes së rastit, ekziston dyshimi i bazuar se gjatë vitit 2025, me dashje dhe në vazhdimësi është përfshirë në sjellje të vëmendjes së padëshirueshme, duke e vënë nën vëzhgim me qëllim të ngacmimit ish të dashurën e tij në Shtime.
Në kërkesën e Prokurorisë thuhet se në veturën e viktimës, i dyshuari kishte vendosur dy GPS për përcjellje të vendndodhjes dhe i ka hapur llogari në rrjetin social “Instagram”, në emër të saj, duke postuar fotografi të ndryshme, me mbishkrime denigruese, duke paraqitur se e njëjta ofron shërbime seksuale me pagesë dhe duke ia publikuar numrin e telefonit dhe adresën e banimit.
Bazuar në informacionet që ka Sinjali, i dyshuari ka dërguar edhe mesazhe kërcënuese, ku ndër të tjera ka shkruar “unë atë (viktimën) gjallë nuk e la, gjaku deri në gu ka me u ba, une e vras veten nëse s’jam me ty – shumë njerëz kanë me dekë…”.
Selmanaj pritet të dalë shumë shpejt para Gjykatës, ku edhe do të merret vendimi ndaj tij./S/
