Paneuropa Kosova mori pjesë në konferencën ndërkombëtare, të organizuar nga Paneuropa Rumania, që u mbajt në Bukuresht. Pjesëmarrja e Paneuropa Kosova në këtë konferencë ndërkombëtare ka një rëndësi të veçantë, për faktin se Rumania është një nga pesë vendet që ende nuk e ka njohur Kosovën.
Delegacioni i Paneuropa Kosova udhëhiqej nga kryetari Arber Prenaj, kurse pjesë e delegacionit ishin edhe Ardian Kolaj dhe Engjell Duzhmani.
Tema kryesore e konferencës ishte: “E ardhmja e Evropës pas raportit të Draghit – Perspektivat dhe implikimet për Rumaninë”, ndërsa u diskutuan edhe disa tema kyçe që prekin zhvillimin ekonomik dhe social të kontinentit.
Kryetari i Paneuropa Kosova, Arber Prenaj, theksoi për Radio Kosovën se gjatë diskutimeve në konferencë u fol për një gamë të gjerë çështjesh që janë të rëndësishme për Evropën, siç janë forcimi i qeverisjes, nevojat energjetike për industrinë e rëndë, aspekte të informatikës dhe Inteligjencës Artificiale, mbrojtjes, konkurrencës dhe transportit, digjitalizimit, investimeve të qëndrueshme, etj.
“Rëndësia e takimit ishte shumëdimensionale pasi aty u diskutuan perspektivat dhe implikimet që kanë këto tema për Evropën, Rumaninë dhe vendet e rajonit, duke përfshirë edhe Kosovën,” theksoi Prenaj.
Pjesëmarrja e Paneuropa Kosova në konferencën ndërkombëtare në Bukuresht ka një rëndësi të veçantë për faktin se Rumania është një nga pesë vendet që ende nuk e ka njohur Kosovën, vlerësoi Prenaj për RTK – Radio.
“Për Kosovën dhe Ballkanin Perëndimor, pjesëmarrja e delegacionit nga Paneuropa Kosova ka luajtur një rol të rëndësishëm në këtë forum, duke adresuar disa çështje kritike që lidhen me zhvillimin ekonomik dhe integrimin e rajonit në Bashkimin Evropian,” theksoi kryetari i Paneuropa Kosova, Arber Prenaj.
Ai shtoi se ka trajtuar nevojën për energji për industritë e rënda, duke potencuar rëndësinë e krijimit të kushteve për zhvillim të qëndrueshëm dhe konkurrencë në industrinë e energjisë.
Ndërkaq, Ardian Kolaj, sekretar i përgjithshëm, ka adresuar problematikën e mungesës së shkathtësive në tregun e punës, një temë që ka ndikim të drejtpërdrejtë në aftësinë e shteteve të Ballkanit Perëndimor për t’u integruar në ekonominë evropiane të digjitalizuar dhe teknologjikisht të avancuar.
Ndërsa Engjell Duzhmani ka diskutuar çështje që lidhen me fushën farmaceutike, duke kërkuar zgjidhje për modernizimin dhe inovacionin në këtë sektor.
