Kryeministri Albin Kurti ka deklaruar se skandali më i madh që e ka kuptuar kur ka marrë postin është në mandatin e parë, kur ka marrë letrën e ish-kryeministrit Hashim Thaçi të dërguar më 2013 për ish-Sekretarin e Përgjithshëm të NATO-s, Anders Fogh Rasmussen, ku thuhet se FSK-ja nuk do të shkojë në veri të Kosovës.
Sipas tij, pas dërgimit të kësaj letre janë krijuar kufij të brendshëm, gjë që ai e ka cilësuar të rrezikshme.
“Skandali më i madh që na ka lënduar më së shumti në fakt ka ndodhur kur kam qenë kryeministër herën e parë në atë periudhën e shkurtër kur e morëm atë letrën që ish-kryeministri Thaçi në vitin 2013 ia pati dërguar ish-Sekretarit të përgjithshëm të NATO-s ku i thoshte se zotohet se Forca e Sigurisë së Kosovës nuk do të shkojë në veri të Kosovës dhe unë besoj se shumë probleme që i kemi sot janë pasojë e asaj. Nuk e kam kuptuar asnjëherë justifikimin, arsyetimin apo shfajësimin për të, por ajo ka qenë shoku i parë që e kam përjetuar si kryeministër… Ai është momenti kur ushtria jonë ka filluar të ndahet gjeografikisht, janë krijuar kufij të brendshëm dhe për mua është tejet e papranueshme dhe e rrezikshme për shkak se Policia nuk menaxhon kufij, Policia menaxhon fluks. Kufirin e menaxhon ushtria”, ka thënë Kurti në emisionin “Rrjedha” në KTV.
Ai ka shtuar se kjo letër është dërguar pikërisht në kohën kur është arritur Marrëveshja e parë e Parimeve me 15 nene, 6 të parat prej të cilave janë për themelimin e Asociacionit të komunave me shumicë serbe dhe katër të tjera për integrimin e strukturave paralele të Serbisë.
“Me vetë faktin që i është dërguar një letër e tillë njëanshëm ish-sekretarit (Anders Fogh) Rasmussen, kjo ka inkurajuar elementet kriminale dhe qarqet politike që gjithmonë e kanë pasur ëndërr ndarjen e Kosovës. Nëse ti thua se ushtria jonë nuk e kalon lumin Ibër, ti shpreh një lloj gatishmërie që atë pjesë nuk do ta trajtosh si pjesë të patjetërsueshme të territorit të Kosovës”, ka thënë ai.
