Kryeministri i Kosovës Albin Kurti mori pjesë në hapjen e fabrikës së re të prodhimit të tubave metalike “Metal Kosova”. Sipas kreu qeveritar kjo është dëshmi që industria në Kosovë është duke u rritur.
“Metal Kosova” është dëshmi që industria në Kosovë është duke u rritur. Nëse shohim eksportet në Kosovë që janë dyfishuar në këto më pak se katër vjetët e fundit përveç teknologjisë së informacionit dhe komunikimit, dallohen përpunimi i metaleve, edhe përpunimi i drurit dhe është interesante që edhe përpunimi i metaleve, edhe përpunimi i drurit, gjallojnë e lulëzojnë si askund tjetër në Kosovë pikërisht këtu në Ferizaj”, tha ai.
Sipas tij, biznese si këto që investojnë e riinvestojnë fitimin, te Qeveria ta kenë partnerin e përhershëm.
“Kush punon, fiton. E ata që e investojnë fitimin, fitojnë edhe më shumë. E ata që e rinvestojnë fitimin më të madh, fitojnë më së shumti. Ne jemi të interesuar krejt këto ndërmarrje, këtë industri që investon e riinveston, që e zgjeron biznesin e rrit numrin e të punësuarve, te Qeveria e Republikës së Kosovës ta kenë partnerin e përhershëm dhe jo vetëm Kosovën si treg të mallrave të tyre”, shtoi kreu qeveritar.
Kurti shprehu zotimin e gatishmërinë që t’i hapin tregje të reja “Metal Kosovës”, por gjithashtu edhe t’i ndihmojnë që numri i punëtorëve të rritet.
“Në mënyrë direkte përfitoni ju, në mënyrë indirekte përfiton edhe shteti sepse të gjithë ju jeni tatimpagues edhe si punëtorë, edhe si pronarë, dhe në këtë mënyrë rritet buxheti i Kosovës, i cili siç na e ka tregu së pari, ministri Murati, vitin e ardhshëm është 50 për qind më i madh sesa në vitin 2021”, tha Kurti.
