Ministri i Financave, Hekuran Murati, ka reaguar ndaj partive opozitare, duke thënë se po premtojnë programe dhe skema punësimi për rininë vetëm gjatë periudhës së fushatës zgjedhore. Sipas tij, opozita nuk ka realizuar asnjë masë konkrete për rininë gjatë kohës që ka qeverisur.
Në një postim në rrjetet sociale, Murati theksoi se Qeveria Kurti ka realizuar tashmë një prej premtimeve të saj për rininë, duke ofruar mundësi punësimi për të rinjtë nga 18 deri në 29 vjeç, përmes platformës “Superpuna”. Ai shpjegoi se të rinjtë që kërkojnë punë mund të gjejnë mundësinë për punësim të subvencionuar nga shteti për një periudhë 6-mujore, me pagë minimale.
Ministri Murati theksoi gjithashtu se paga minimale për punësimin në platformën “Superpuna” është rritur në 350 euro për orar të plotë që nga muaji tetor i këtij viti, dhe bizneset mund të ofrojnë paga më të larta. Ai theksoi se, përderisa partitë opozitare vazhdojnë të premtojnë skema që nuk i kanë realizuar kurrë, Qeveria Kurti ka marrë hapa konkretë për mbështetje të rinisë.
“A din dikush të më tregojë qoftë edhe një masë të vetme mbështetëse për rininë që kanë bërë qeveritë e kaluara për 20 vite qeverisje?”, pyeti Murati.
