Gjykata Themelore e Mitrovicës e ka dënuar me 3 vjet burgim të akuzuarin Korab Pepaj, për akuzën se në cilësinë e zyrtarit policor të Njësisë Speciale e ka kryer veprën penale “Vrasje në tentativë”, kurse të akuzuarit Faton Maloku, Samet Uka dhe Muhamet Muqiqi i ka liruar nga aktakuza për veprën penale “Moslajmërim të veprave penale apo kryerësve të tyre”.
Pepaj u lirua nga aktakuza për veprën penale “manipulim me prova”.
Në dënimin me burgim, atij do t’i llogaritet edhe koha e kaluar në paraburgim.
Prokuroria Themelore në Mitrovicë kishte ngritur aktakuzën ndaj të katër personave më 3 korrik 2023. Pepaj akuzohej se në cilësinë e zyrtarit policor, më 10 prill 2023, në rrugën magjistrale Leposaviq-Mitrovicë në pikën e kontrollit të automjeteve në fshatin Lozishtë, saktësisht te “Ura e Bistricës”, ka tentuar ta privojë nga jeta të dëmtuarin M.J..
Sipas aktakuzës, i pandehuri në detyrë zyrtare i ka dhënë shenjë me bateri që të ndalej i dëmtuari që po voziste veturën nga drejtimi i Leposaviqit në drejtim të Mitrovicës. , ai nuk është ndalur dhe ka vazhduar rrugën, por viktima kishte vazhduar përpara. Pas kësaj, Pepaj akuzohet se ka shtënë dy herë me armën zyrtare, ku e ka goditur automjetin nga prapa dhe me atë rast vozitësi i automjetit M. është goditur me një plumb në krahun e djathtë, shkruan Betimi për Drejtësi.
Me këtë, Pepaj akuzohej se ka kryer veprën penale “Vrasje në tentative”.
Pepaj akuzohej po ashtu se kishte fshehur dy gëzhojat e predhës së armës. Ndërsa Maloku, Uka dhe Muqiqi akuzoheshin se si zyrtarë policorë të Njësisë Speciale, kanë qenë në dijeni për identitetin e kryerësit të veprës penale “Vrasje në tentativë”, dhe nuk e kanë lajmëruar veprën penale dhe kryerësin e veprës penale tek eprorët e tyre. Me këtë, akuzoheshin se kanë kryer veprën penale “Moslajmërimi i veprave penale apo kryerësve të tyre”
