Eraj Temaj është dënuar me dy vjet burgim pasi është shpallur fajtor për aksidentin që kishte ndodhur në maj të 2022-s ku kishte vdekur një 23-vjeçar në fshatin Shtupel të Klinës.
Aksidenti kishte ndodhur në maj të 2022-s derisa vdekja e J.T kishte ndodhur më 16 korrik 2022 nga gjakderdhja në tru.
Aktgjykimi dënues ndaj Temajt është shpallur më 14 nëntor 2024 në Gjykatën Themelore në Pejë, dega në Klinë, nga gjykatësja e rastit Sabrije Rracaj.
Pos dënimit me dy vjet burgim ndaj të akuzuarit Temaj, gjyqtarja Rracaj ka shqiptuar dënimin plotësues, marrjen e lejes së vozitjes për periudhën 2 vjet pas plotfuqishmërisë së aktgjykimit.
Gjykata ka gjetur se bazuar në ekspertizën është konstatuar se shkaktar i drejtpërdrejtë i aksidentit me fatalitet ishte i pandehuri Eraj Temaj.
Sipas gjetjeve të gjykatës, mbrojtja e të akuzuarit është përpjekur t’iu shmanget, mohojë dhe zvogëlojë përgjegjësinë penale por se mbrojtja e tij nuk qëndron, është kontradiktore dhe aspak bindëse.
Tutje, sipas raportit të autopsisë, ishte konstatuar se vdekja e tani të ndjerit J.T.,, ishte vdekje e dhunshme e cila kishte ardhur si rrjedhojë e gjakderdhjes që kishte ardhur si pasojë e kockave të thyera të kokës.
Sipas gjetjeve të gjykatës, i akuzuari kishte bërë nisje të pasigurt me veturën BMW, në raport me viktimën, si dhe kishte konstatuar se viktima kishte vrapuar dhe kishte hipur mbi bagazhin e veturës në fjalë dhe vozitësi Eraj Temaj, nuk e vëren fare personin që e ka mbi veturë, fillon me nxitim të vepruar dhe më pas bie në asfalt.
Gjykata ka gjetur se i akuzuari Temaj është përgjegjës për veprën penale “rrezikim i trafikut publik”.
Sipas aktakuzës, i akuzuari Eraj Temaj, po ngarkohet se ka kryer veprën penale “Rrezikim i trafikut publik”, sepse më 27 maj 2022, rreth orës 21:14 në fshatin Shtupel të Klinës, nga pakujdesia kishte shkelur ligjin mbi trafikun publik apo transportin rrugor dhe rrezikoi jetën e njerëzve, e cila rezultoi me vdekjen e këmbësorit tani të ndjerit J.T.
Në aktakuzë thuhet se derisa i pandehuri Temaj, ishte duke qëndruar në rrugë së bashku me shokët e tij, në një moment niset me automjetin e tij me qëllim që ta largojë veturën nga rruga, aty viktima J.T., njëri nga shokët e të pandehurit ishte ulur mbi bagazh të automjetit, i akuzuari Temaj nuk e vëren fare këmbësorin e ulur mbi bagazh të veturës së tij dhe gjatë lëvizjes së veturës J.T humb stabilitetin e tij fiksues dhe për pasojë rrëshqet dhe bie në sipërfaqe të fortë asfalt duke rënë me kokë, me ç‘rast pëson lëndime të rënda trupore, ku gjatë trajtimit mjekësor pranë QKUK-së, në Prishtinë, i njëjti ndërron jetë më datë 16 korrik 2022, si pasojë e aksidentit./BetimipërDrejtësi
