Një zyrtar policor është arrestuar pasi dyshohet se ka shkaktuar një aksident rrugor me veturë zyrtare, ka njoftuar Inspektorati Policor i Kosovës.
IPK-ja bëri me dije të hënën se aksidenti ka ndodhur më 5 nëntor në kryqëzimin e rrugëve “Dëshmorët e Kombit” dhe “Henri Dunant” në Prishtinë, ku si pasojë e aksidentit ka humbur jetën një person, derisa po trajtohej në QKUK.
Inspektorati bëri me dije se me urdhër të prokurorit, zyrtar policor dyshohet se ka kryer veprën penale “rrezikim i trafikut publik” dhe i është caktuar masa e ndalimit për 48 orë.
“Inspektorati Policor i Kosovës respektivisht hetuesit e Departamentit të Hetimeve kanë arrestuar sot një zyrtar policor me dyshimin se i njëjti ka kryer veprën penale “Rrezikimi i trafikut publik” në një aksident trafiku me veturë zyrtare. Aksidenti raportohet të ketë ndodhur më 05.11.2024 rreth orës 05:00 në kryqëzimin e rrugëve ‘Dëshmorët e Kombit’ dhe ‘Henri Dunant’ në Prishtinë. Në këtë aksident ishin përfshirë dy vetura, një veturë zyrtare e Policisë së Kosovës e modelit Skoda Octavia dhe një veturë private e modelit Skoda Karoq të cilën ka qenë duke e drejtuar një qytetar i Vushtrrisë. Si pasojë e këtij aksidenti dyshohet se lëndime të rënda trupore kishte pësuar vozitësi i veturës Skoda Karoq, i cili ishte dërguar për tretman mjekësor në QKUK – Prishtinë”, thuhet në komunikatën për media.
Zyrtari policor i cili ishte duke drejtuar veturën zyrtare është suspenduar me rekomandim të IPK-së ditën e aksidentit.
