Rrjeti i Grave Gazetare të Kosovës ka dorëzuar kërkesën te Komisioni i Pavarur i Mediave lidhur me shqetësimet e ngritura për përmbajtjen problematike të programit Big Brother VIP, të transmetuar nga Klan Kosova.
Rrjeti i Grave Gazetare ka thënë se vendimi i Klan Kosovës për të lejuar një përballje të tillë në këtë format mediatik krijon një precedent të rrezikshëm për të drejtat e njeriut dhe promovon dhunën si formë spektakli, e cila është një praktikë e papranueshme, e dëmshme dhe e dënueshme në çdo shoqëri.
Gazetaret e Kosovës i kanë kërkuar KPM-në që të shfrztëyojnë kompetencat tyre dhe të ndërpresë menjëherë transmetimin e Big Brother VIP Kosova derisa personi i akuzuar për dhunë në familje të largohet nga ky format televiziv.
“Komisioni i Pavarur për Media ka të drejtën të ndalojë menjëherë transmetimin e një emisioni nëse vlerëson se ai përbën rrezik për sigurinë publike, moralin, rendin publik, ose për mbrojtjen e të drejtave të të tjerëve. Duke marrë parasysh rëndësinë e të drejtave të njeriut dhe të drejtës për një ambient të sigurt për çdo pjesëmarrës, ne kërkojmë që Komisioni i Pavarur i Mediave të ndërpresë menjëherë transmetimin e Big Brother VIP Kosova derisa personi i akuzuar për dhunë në familje të largohet nga ky format televiziv. Respektimi i kodit etik është thelbësor për të garantuar që programet televizive në Kosovë të ofrojnë përmbajtje të përgjegjshme që respekton të drejtat dhe mirëqenien e individëve, në veçanti të mbijetuarve të dhunë” thuhet ndër të tjera në ankesën që kanë dorëzuar Rrjeti i Grave Gazetare të Kosovës në KPM.
