Ka nisur seanca e jashtëzakonshme e Kuvendit të Kosovës, e thirrur nga Grupi Parlamentar i LDK-së i mbështetur edhe nga 43 deputetë të tjerë lidhur me situatën në Korporatën Energjetike të Kosovës.
Në këtë seancë po mungojnë deputetët e LVV-së.
Shefi i GP-së të LDK-së, Arben Gashi ka deklaruar se këtë seancë e kanë thirrur me qëllim të diskutimit lidhur me skandalet dhe keqmenaxhimin në KEK.
“Kjo seancë është e domosdoshme për zhvillimin e një debati të gjerë parlamentar lidhur me situatën alarmante të shkaktuar në KEK.
Kjo seancë ka për qëllim që Kuvendi të adresoj këto shqetësime dhe të diskutohen masat që duhet të ndërmerren për të përmirësuar menaxhimin në KEK, për të rritur transparencën dhe për të ndaluar ndërhyrjet e paligjshme”, tha Gashi.
Ai shtoi se çështjet specifike që kërkojnë të trajtohen gjatë këtij debati janë:
-Skandalet me tenderët njëburimor dhe mungesa e konkurrencës në prokurimin publik në KEK.
-Shitblerja e energjisë elektrike dhe ndikimi financiar në financat e vendit.
-Ndërhyrja e personave jashtë institucional në menaxhimin e KEK-ut, dhënia e tenderëve, punësimet dhe tregtinë me energjinë.
-Përfshirja e personit të quajtur Dejona Mihali si Koordinatore e LVV-së dhe ndërhyrjet e paligjshme në KEK, përfshirë punësimet.
Gashi gjithashtu ka propozuar votimin e një rezolute që përmban këto shtatë pika:
-Kuvendi i Kosovës kërkon nga organet kompetente që të vazhdojnë hetimet e plota dhe të thelluara për skandalet e KEK-ut, duke përfshirë keqmenaxhimin e tenderëve njëburimor dhe mungesën e konkurrencës në prokurimin publik. Të gjitha shkeljet e konstatuara të ndiqen penalisht.
-Kuvendi i Kosovës kërkon nga Qeveria e Kosovës dhe bordi i KEK-ut që të raportojnë për kontratat e shitblerjes energjetike gjatë periudhës 2001-2024 duke përfshirë kushte të favorshme për palët e treta dhe ndikimin financiar në financa publike. Kuvendi obligon organet përkatëse që të rishikojnë këto kontrata dhe të mbrojnë interesin publik dhe të eliminojnë secilën parregullsi.
-Kuvendi kërkon nga autoritetet kompetente të hetojnë ndërhyrjen e personave të paautorizuar në menaxhimin dhe vendimmarrjen e KEK-ut veçanërisht në lidhje me dhënien e tenderëve, tregtinë e energjisë dhe punësimin. Të merren masa konkrete për të ndaluar ndërhyrjet e paligjshme për të siguruar një menaxhim transparent dhe të pavarur në KEK
-Kuvendi kërkon hetim të plotë për rolin e personit të quajtur Dejona Mihali dhe çdo personi tjetër që ka ushtuar ndikim të jashtëligjshëm në menaxhimin në KEK dhe në procesin e rekrutimit, duke përfshirë punësimet e jashtëligjshme
-Kuvendi obligon Bordin e KEK-ut dhe institucionet përgjegjëse për menaxhimin e energjisë që të rrisin transparencën, duke përfshirë publikimin e kontratave dhe raportimin e detajuar mbi performancën financiare dhe operacionale.
-Kuvendi rekomandon që Qeveria e Kosovës të marrë masa për përmirësimin e qeverisjes në KEK duke emëruar një Bord të pavarur dhe profesionist me qëllim që të sigurohet funksionimi efikas dhe i përgjegjshëm i ndërmarrjes.
-Kuvendi kërkon nga Qeveria e Kosovës dhe Bordi i KEK-ut që të raportojë çdo tre muaj për situatën në KEK, përfshirë masat e marra për përmirësimin e menaxhimit të prokurimit publik, transparencën dhe procesin e punësimeve.
