Hetuesit e Inspektoratit Policor të Kosovës (IPK) i kanë rekomanduar Policisë së Kosovës suspendimin për një zyrtar policor me detyrë në pikë kalimin kufitar në Han të Elezit me dyshimin se i njëjti ka kryer veprën penale “Keqpërdorim i pozitës apo autoritetit zyrtar”.
Në njoftimin e IPK-së thuhet se zyrtari dyshohet se derisa ka qenë me detyrën e kontrollit në dalje të Kosovës, nuk i ka ndaluar e futur në sistem të dhënat e një personi të dyshimtë.
“Bazuar në veprimet fillestare hetimore dyshohet se zyrtari policor (tashmë i suspenduar) më 03.10.2024 ka qenë duke e kryer detyrën e kontrollimit në kabinën e cila është në dalje të Republikës së Kosovës në pikë kalimin kufitar në Han të Elezit dhe dyshohet se i njëjti nuk ka ndalur e as ka futur në sistem te të dhënave të PK-së të dhënat një personi të dyshimtë i cili është ndaluar më vonë nga policia në Maqedoninë e Veriut si i dyshuar për kontrabandë me lëndë narkotike”, thuhet në njoftim.
Hetuesit e IPK-së po vazhdojnë veprimet hetimore drejt ndriçimit të rrethanave të këtij rasti.
