Përfaqësuesit e Ballkanit Perëndimor Gjashtë miratuan Deklaratën e Hamburgut mbi Agjendën e Gjelbër për Ballkanin Perëndimor (GAWB), duke rinovuar angazhimin e tyre për GAWB në takimin e organizuar nga Këshilli i Bashkëpunimit Rajonal (RCC) në bashkëpunim me Ministrinë Federale të Bashkëpunimit Ekonomik dhe Zhvillimit të Gjermanisë, dhe mbështetur nga Komisioni Evropian, në Hamburg sot.
“Zemrat tona janë të rënduara nga imazhet shkatërruese që vijnë nga Bosnja dhe Hercegovina – jetë të çmuara të humbura dhe infrastruktura të dëmtuara rëndë – duke rikujtuar tragjedinë e përmbytjeve të rënda të vitit 2014. Tragjedi të këtij lloji mund të na sjellin dëshpërim por dhe mobilizim me vendosmëri edhe më të madhe për të mbrojtur njerëzit dhe shtëpitë tona. Problemet kryesore mjedisore për qytetarët tanë janë: ndotja e ajrit 57%, ndotja e ujit 43%, ndotja e tokës 38% dhe menaxhimi i dobët i mbetjeve në 37%. Agjenda e Gjelbër e Ballkanit Perëndimor, e miratuar 3 vjet më parë, mund të kontribuojë me të vërtetë në reduktimin e ndotjes, në uljen e emetimeve të karbonit dhe në arritjen e objektivave tona të përbashkëta për klimë të neutralizuar. Kriza klimatike nuk po ngadalësohet, dhe është një sfidë e madhe që kërkon rritjen e ambicies dhe rritjen e investimeve. Na nevojitet të jemi më mirë të përgatitur për ndryshimet klimaterike, për të mbrojtur dhe rikuperuar biodiversitetin tonë, dhe të dekarbonizojmë dhe industrializojmë në mënyrë paralele. Rritja e qëndrueshme dhe gjithëpërfshirëse që prioritizon njerëzit, natyrën dhe klimën duhet të jetë pika e referimit e të gjitha veprimeve tona,” tha Sekretarja e Përgjithshme e RCC-së, Majlinda Bregu gjatë takimit.
Përveç krijimit të Takimit Ministror mbi GAWB si një ngjarje vjetore nga ky moment e tutje, Deklarata e Hamburgut mbi GAWB thekson disa iniciativa kyçe, duke përfshirë fillimin e Rishikimit të Planit të Veprimit të GAWB, përfundimin e “Planit Rajonal të Veprimit për Parandalimin e Ndotjes nga Plastika, përfshirë mbeturinat detare,” dhe Planin e Veprimit për Përshtatjen ndaj Klimës për WB6, zhvillimin e Planit të Strategjisë për Biodiversitetin e Ballkanit Perëndimor 2030 dhe krijimin e një sistemi për monitorimin, raportimin, verifikimin dhe akreditimin (MRVA) të emetimeve. Deklarata do të përfshihet në Konkluzionet e Kryetarëve të Samitit të Procesit të Berlinit 2024, që do të zhvillohet më 14 tetor në Berlin.
Ministrja gjermane për Bashkëpunimin Ekonomik dhe Zhvillimin, Svenja Schulze, theksoi se zhvillimi i qëndrueshëm i Europës varet nga një bashkëpunim i fortë rajonal dhe nga momenti politik aktual i Procesit të Berlinit, duke e vlerësuar Ballkanin Perëndimor për angazhimin dhe përparimin drejt qëllimeve të përbashkëta për qëndrueshmëri.
Qëllimi kryesor i këtij Takimi të Parë Vjetor Ministror mbi Agjendën e Gjelbër për Ballkanin Perëndimor (GAWB) ishte të rishikohej progresi i bërë në zbatimin e Planit të Veprimit të GAWB për të gjitha shtatë komponentët, dhe të ofrohej udhëzimi strategjik për përpjekjet e ardhshme. Nëpërmjet diskutimeve interaktive dhe shkëmbimeve, pjesëmarrësit identifikuan fusha suksesi, sfida dhe mundësi, dhe ranë dakord për masa për të përshpejtuar progresin drejt qëllimeve të përbashkëta mjedisore.
Këshilltari i Komisionit Evropian për Ballkanin Perëndimor në Drejtorinë e Përgjithshme për Zgjerim dhe Politikat e Fqinjësisë, Wojciech Kowalski, theksoi varësinë e ndërsjellë midis BE-së dhe Ballkanit Perëndimor për tranzicionin e gjelbërt , duke theksuar rolin thelbësor të sektorit privat në arritjen e qëllimeve të Agjendës së Gjelbër, duke falenderuar RCC-në dhe të gjithë partnerët rajonalë për angazhimin e tyre për ta bërë zhvillimin e qëndrueshëm një prioritet të përbashkët.
Takimi Ministror mbi Agjendën e Gjelbër për Ballkanin Perëndimor (GAWB), i mbajtur për herë të parë këtë vit brenda Procesit të Berlinit, është një platformë kyçe për avancimin e qëndrueshmërisë mjedisore dhe qëndrueshmërisë ndaj klimës në rajon. Në përputhje me Deklaratën e Sofjes, ky takim bashkon palët e interesuara për të rishikuar progresin, për të përballuar sfidat dhe për të përkufizuar veprimet e ardhshme.
