Ekipet e shpëtimit nga fqinjët e Bosnjës dhe po ashtu nga shtetet e Bashkimit Evropian i janë bashkuar të dielën përpjekjeve për t’i pastruar rrugët e për të gjetur njerëz që ende rezultojnë të zhdukur si pasojë e përmbytjeve dhe rrëshqitjeve të dheut, raporton agjencia “AP”.
Bosnja kërkoi ndihmë nga BE-ja pasi një stuhi e madhe shiu gjatë natës të së premtes përmbyti dhe shkatërroi rrugët dhe urat, duke lënë të paktën 18 të vdekur e dhjetëra të lënduar.
Zyrtarët thanë se të paktën 10 persona ende rezultojnë të pagjetur, shumë prej tyre nga fshati Donja Jablanica, në jug të Bosnjës, që është thuajse plotësisht e mbuluar nga shkëmbinjtë dhe rrënojat nga një gurore që gjendej sipër kodre.
Banorët thanë se kanë dëgjuar gjëmim bubullimash dhe kanë parë shtëpi të zhduken para syve të tyre.
Luigi Soreca, që kryeson misionin e BE-së në Bosnjës, ka shkruar në platformën “X” se BE-ja qëndron me Bosnjën dhe se ekipet po vijnë për ta ndihmuar.
Autoritetet kanë thënë se ka arritur një ekip nga Kroacia ndërsa një ekip nga Serbia pritet të arrijë pasdite, e po ashtu edhe ekip nga Sllovenia.
Mali i Zi, Maqedonia e Veriut, Polonia, Çekia e Turqia po ashtu kanë ofruar ndihmë, thuhet në një komunikatë të qeverisë.
Të dielën (sot) po mbahen zgjedhjet lokale në Bosnjë. Autoritetet elektorale kanë shtyrë votimin në zonat e goditura nga përmbytjet, por përmbytjet kanë lënë në hije votimin edhe në pjesën tjetër të vendit.
Ismeta Bucaloviq, banore nga kryeqendra Sarajeva, ka thënë se e kanë mendjen te ngjarja tragjike.
