Ish-kryeministri, tash deputet i Lidhjes Demokratike të Kosovës, Avdullah Hoti, ka thënë se reformat fiskale janë “dështimi tjetër” i qeverisë aktuale.
Hoti në Facebook ka përmendur dy reforma fiskale, për të cilat thotë se mungojnë: Rimbursimi i Tatimit në Vlerën e Shtuar (TVSH) duhet të jetë automatik kurdo që biznesi kërkon dhe TVSH-së do të duhej të mblidhej brenda vendit.
“Kjo reformë mbeti përgjysmë që në kohën e Qeverisë Mustafa, kur u punua koncept dokumenti për bashkimin e ATK-së dhe Doganës. Formalizimi i vazhdueshëm i ekonomisë dhe krijimi i historikut tatimor të bizneseve, krahas ndërlidhjes së të gjitha platformave elektronike lidhur me tatimet, kadastrin, hipotekat dhe kreditë bankare, kanë krijuar parakushtet për kalim të mbledhjes së TVSH-së brenda bendit pasi të shiten mallrat. Kjo do të ishte lehtësim i madh për biznese”, ka shkruar Hoti.
Sipas tij, këto reforma i mbeten qeverisë së ardhshme, duke theksuar se janë “shumë komplekse për reformatorët e tatimit në paga prej 6.8 euro”.
