Kryetari i Kuvendit të Kosovës, Glauk Konjufca, ka deklaruar se nëse Lëvizja Vetëvendosje nuk do të kishte qenë në pushtet, veriu i Kosovës do të kishte përfunduar në negociata, veçanërisht pas dorëheqjeve të serbëve nga institucionet kosovare.
Sipas Konjufcës, Kosova kishte dy opsione, shtrirjen e sovranitetit dhe integritetit në atë pjesë të vendit ose dorëzimin.
Ai ka theksuar se opsioni i dorëzimit nuk ka qenë kurrë në konsideratë për Qeverinë e Kosovës.
“Juve ju kujtohet, ishte një bojkotim i orkestruar prej anës së policëve, kryetarëve të komunave edhe Kosova ishte para dy opsione. Unë jam i sigurt që po të kishte qenë opsioni i vjetër politik në Kosovë, do të kishim përfunduar në negociata, por kjo nuk ka qenë opsioni jonë, opsioni jonë është kushtetutshmëria me çdo kusht, qoftë edhe përmes përdorimit të organeve të sundimit të ligjit për të vendosur atje rendin dhe ligjin. Kosova do të përfundonte shumë keq nëse pas dhunës, pas kushtëzimeve dhe pas imponimeve, veriu i Kosovës do të përfundonte në negociata. Kjo nuk ka qenë opsion për Lëvizjen Vetëvendosje dhe për qeverisjen e Kosovës”, ka thënë Konjufca para medieve.
Konjufca ka komentuar edhe konferencën për medie të presidentit serb, Aleksandër Vuçiq, duke thënë se nuk i bëjnë përshtypje kërcënimet e tij.
Ai e ka konsideruar konferencën si një përpjekje për të ruajtur strukturat paralele që nuk ekzistojnë më dhe për ta kërcënuar Republikën e Kosovës.
Tash Vuçiqi po tenton t’i ruaj ato, me i ruajt ato që nuk i ka më edhe faktikisht po kërcënon Republikën e Kosovës përmes konferencës së tij për shtyp, mirëpo ky është një kërcenim i cili me thënë të drejtën nuk na bën shumë përshtypje. Ne nuk frikësohemi, nuk shqetësohemi sepse në atë pjesë të vendit janë institucionet e Kosovës, janë institucionet e sigurisë, janë institucionet politike, janë komunat që funksionojnë edhe është shansa e humbur e qytetarëve që kanë mendime të tjera për me marr pjesë në procesin politik edhe me dashtë me qenë bashkëpjesëmarrës në procesin politik. Pas kësaj që ka ndodhur, vendi e ka marrë një drejtim të ri”, u shpreh Konjufca.
Mes të tjerash, Konjufca ka theksuar se Kosova është e fortë dhe e qëndrueshme, duke pasur në veri institucionet e saj të sigurta që funksionojnë normalisht.
Konjufca ka shtuar se ky është një proces i nevojshëm për forcimin e kushtetutshmërisë dhe të shtetësisë së Kosovës.
