Deri tani nga institucionet e shtetit të Kosovës janë lëshuar 1,501 fletëdeklarime për serbët që kanë hyrë në Kosovë nga mesnata në pikat kufitare, përpos Jarinjes dhe Bërnjakut që ende janë duke vazhduar të jenë të mbyllura.
Këto të dhana i ka publikuar ministri i Punëve të Brendshme, Xhelal Sfeçla, i cili tha se në të gjitha pikat tjera kufitare në hyrje të Republikës së Kosovës po vazhdon lëshimi i dokumentit për hyrje-dalje.
“Përveç në pikat kufitare Jarinje dhe Bërnjak të cilat vazhdojnë të jenë të mbyllura për shkak të zhvillimeve të shkaktuara nga strukturat ilegale serbe, në të gjitha pikat tjera kufitare në hyrje të Republikës së Kosovës po vazhdon lëshimi i dokumentit për hyrje-dalje. Deri më tash, janë lëshuar 1501 dokumente në pikat kufitare”, ka shkruar ai në rrjetin social.
E shumica e dokumenteve janë lëshuar në pikën kufitare tek Dheu i Bardhë me 607 dokumente të lëshuara atje, mandej vjen pika kufitare Muqibabë me 396, si dhe në Merdare 295.
