Shtiu me armë në ajër, arrestohet 28-vjeçari në Shtime

Arrestohet një person për përdorim të armës apo mjetit të rrezikshëm dhe mbajtje në pronësi, kontroll apo posedim i paautorizuar i armëve në Shtime

Njësia e Hetimeve të stacionit në Shtime, e mbështetur edhe nga policët e rendit, në bazë të një urdhërese të Gjykatës Themelore të Ferizajt, me datën 28.08.2024, rreth orë 13:00 ka realizuar një kontroll në fshatin Petrovë të Shtimes dhe në shtëpinë e të dyshuarit R.R ( M/K) i moshës 28 vjeçar, kanë gjetur dy armë të zjarrit : një pushkë automatike dhe një pistoletë.

Në njoftimin e policisë thuhet se kontrollit të shtëpisë së të dyshuarit R.R i ka paraprirë një hetim disa ditësh nga hetuesit policorë, pasi i dyshuari kishte shtënë me pistoletë në ajër, në një fushë në rajonin Shtimes.

I dyshuari është shoqëruar në stacionin e policisë në Shtime dhe pas intervistimit nga hetuesit policorë,  me vendim të prokurorit të shtetit është ndaluar në mbajtje për 48 orë, për procedura tjera hetimore, ndërsa si provë materiale janë sekuestruar dy armët e zjarrit.

Rasti është cilësuar “Përdorim i armës apo mjetit të rrezikshëm”  dhe ” Mbajtje në pronësi, kontroll apo posedim i paautorizuar i armëve në Shtime.