Aleanca Kundër Importit të Plehrave (AKIP) ka reaguar këtë të mërkurë lidhur me deklaratat e Qeverisë Shqiptare ndaj skandalit të mbetjeve industriale të eksportuara drejt Tailandës.
Sipas AKIP, qeveria do duhej të analizonte se me çfarë sistemi monitorohen dhe përpunohen mbetjet industriale në Kurum, në vend që të mohonte përgjegjësinë për këtë skandal.
“Në vend që të mohojë çfarëdolloj përgjegjësie, të cilën, ndoshta e ka e ndoshta jo, qeveria duhet të shtrojë pyetjen themelore se me çfarë sistemi dhe me çfarë infrastrukture shtetërore mbetjet industriale të Kurum apo të kompanive të tjera, raportohen, monitorohen dhe përpunohen, dhe me çfarë mjetesh shtetërore ne sigurohemi që këto mbetje nuk hidhen kuturu nëpër Shqipëri për të dëmtuar mjedisin dhe shëndetin”, deklaron AKIP.
Reagimin e qeverisë, AKIP e ka cilësuar “zhgënjyes”, duke sjellë në vëmendje menaxhimin e situatës në fjalë dhe mbajtjen e përgjegjësisë në çdo rast.
“Qeveria duhet të ketë parasysh se është detyrë njerëzore që Shqipëria, përveç që të menaxhojë siç duhet mbetjet e veta, qofshin këto të rrezikshme apo të parrezikshme, të sigurohet që këto mbetje nuk do të eksportohen për groposje në një vend tjetër të varfër si Tailanda dhe se Marrëveshja e Baselit, ku Shqipëria është palë, nuk është një copë letre e pavlerë e harruar në ndonjë sirtar, por një instrument shumë i rëndësishëm që Shqipëria duhet ta zbatojë, në mbrojtje të natyrës dhe shëndetit të popullsisë shqiptare, por edhe të vendeve të tjera të varfra si ne”, thuhet në deklaratë, raporton EuronewsAlbania.
Ndryshe, Zëvendëskyrministrja dhe njëkohësisht edhe Ministrja e Infrastrukturës dhe Energjisë (MIE) në Shqipëri, Belinda Balluku, i është përgjigjur sot interesit të gazetarëve për eksportin e mbetjeve të rrezikshme nga Porti i Durrësit.
Ajo hedh poshtë përfshirjen e Autoritetit Portual të Durrësit në këtë çështje dhe përgjegjësinë ia faturon koncensionarit evropian që operon në këtë port.
Sipas saj Autoriteti Portual i Durrësit me koncensionarin që ka kryer këto transporte janë dy etnitete konkurrente.
