Presioni ndërkombëtar ndaj Serbisë po shihet si e vetmja rrugë për të mundësuar dorëzimin në Kosovë të terroristit Milan Radoiçiq. Kjo pasi zyrtarë të lartë serbë vazhdojnë të mohojnë mundësinë që atë t’ia dorëzojnë institucioneve kosovare për të dhënë përgjegjësi për sulmin terrorist në Banjskë. Çdo ditë që ai e kalon në liri, vlerësohet e rrezikshme për sovranitetin e Kosovës.
Ekstradimin e Milan Radoiçiqit në Kosovë e quajti të pamundur zëvendëskryeministri i Serbisë, Ivica Daçiq.
Dorëzimi i kryeterroristit serb pas sulmit në Banjskë, i cili është i sanksionuar nga SHBA-ja dhe Britania, kërkohet me ngulm nga institucionet kosovare.
Por, mundësia e vetme që kjo të ndodhë, sipas anëtarit të Komisionit Parlamentar për Siguri, Enver Dugolli thotë se është presioni nga Amerika dhe partnerët tjerë ndërkombëtarë mbi Serbinë.
“Të them të drejtën kjo nuk ndodh pa një presion të madh nga bashkësia ndërkombëtare, të ketë lëvizje në këtë drejtim. Ai është i lirë atje në Serbi dhe vazhdon me aktivitete të përditshme, stërvit dhe nuk ka ndonjë lëvizje sa i përket ekstradimit”, tha Dugolli, për RTV Dukagjini.
Por, pse Serbia nuk po pranon ta dorëzojë Radoiçiqin?
“Vuçiq e Daçiq nuk e dorëzojnë Radoiçiqin, pasi i bie sikurse ta dorëzojnë vetveten, pasi ata qëndrojnë pas Radoiçiqit”, tha Dugolli.
Kurse njohësi i çështjeve të sigurisë, Drizan Shala, thotë se lënia e Radoiçiqit në liri nënkupton automatikisht rrezik për shtetin e Kosovës.
“Pa dyshim që do të nxitet me deklarata të tilla të Beogradit zyrtar që të marrë ndonjë cenim të mundshëm të territorit të Kosovës”, tha Shala.
E, krejt çka Serbia mund të bëjë, sipas Shalës, është arrestimi i Radoiçiqit nga prokuroria serbe dhe mbajtja e tij disa ditë prapa grilave sa për t’u arsyetuar tek ndërkombëtarët.
“Sipas asaj që mund të vërehet dhe narrativës qeveria e Serbisë do të argumentojë që pushtetet janë të ndara dhe do të nxisë prokurorinë të bëjë një ftesë sa për të arsyetuar veprimet hetimore, dhe te dal mirë para faktorit ndërkombëtar”, tha Shala.
Radoiçiq udhëhoqi grupin e tij terrorist gjatë sulmit në Banjskë të Zveçanit më 24 shtator të vitit të kaluar, ku u vra rreshteri policor i Kosovës, Afrim Bunjaku.
