Triera Kasumi Berisha, asambliste e Kuvendit Komunal të Prishtinës nga radhët e partisë Guxo, ka reaguar ndaj veprimeve të fundit të partive opozitare
Në një postim në Facebook, ajo theksoi se këto parti, që kanë qenë të angazhuara në sulme të përditshme ndaj zëvendëskryeministres dhe ministres së Punëve të Jashtme, Donika Gërvalla, tashmë po sabotojnë komisionin hetimor që ato vetë e kërkuan.
“Në vazhdën e sulmeve të përditshme të Pronto-partive, ata kërkuan edhe komisionin hetimor në mënyrë që të kenë edhe një armë për të sulmuar zëvendëskryeministren dhe ministren e Punëve të Jashtme, Donika Gërvalla, komision që tani vetë e bojkotojnë. Por, ata dështuan keq, sepse e drejta dhe e vërteta është gjithmonë me ministren tonë të Jashtme”.
Sipas Berishës, këto parti nuk kanë paraqitur asnjë fakt ose provë që mbështet pretendimet e tyre dhe, kur janë ballafaquar me të vërtetat e papëlqyeshme lidhur me veprimet dhe emërimet e paligjshme të tyre të mëparshme, kanë filluar të pengojnë funksionimin e komisionit.
“Është rast i rrallë në demokraci që ata që kërkojnë vetë komisionin hetimor, e sabotojnë të njëjtin”, përfundoi Berisha.
