Tomë Gashi, avokati i familjes Fejzullahu, ka paralajmëruar se do ankohet mbi aktgjykimin dënues të sotëm me 19 vjet burgim ndaj dy të miturve për vrasjen e 18-vjeçarit, Lulzim Fejzullahu nga Podujeva.
Sipas avokatit Gashi, me këtë aktgjykim, “është vërtetuar sërish se ata që vranë Fejzullahun kanë vepruar në bashkëveprim me njëri-tjetrin” duke theksuar se do kërkojë që dënimi ndaj tyre të jetë maksimal.
”Gjykata Themelore Prishtine sot ka shpallur Aktgjykimin për vrasjen e rëndë të 18 vjeçarit, Lulzim Fejzullahu Sikurse herën e kaluar Gjykata njërin e ka dënuar me burgim në kohëzgjatje prej 10 vitesh e tjetrin me dënim me burgim prej 9 vitesh. Me këtë Aktgjykim është vërtetuar edhe njëherë se ata që vranë Lulin kanë vepruar në bashkëveprim njëri me tjetrin dhe se vrasjen e rënde e kanë kryer me dashje të plotë. Si avokat – përfaqësues juridik i familjes se Lulit do të paraqes ankesë që dënimi për të dytë të jetë maksimal”, ka shkruar Gashi në Facebook.
Ndryshe, sot dhe në rigjykim, Gjykata Themelore në Prishtinë i ka shpallur fajtorë dy të miturit për vrasjen e Lulzim Fejzullahut që kishte ndodhur në janarin e këtij viti në Podujevë.
Njëri i mitur është dënuar me 10 vjet burgim, e tjetri me 9 vjet burgim, duke konfirmuar vendimin e parë, që ishte marrë në maj.
