Deputeti i Lëvizjes Vetëvendosje, Armend Muja, i ka reaguar deputetit të Aleancës për Ardhmërinë e Kosovës, Shemsedin Dreshaj, që të hënën u ankua se VV-ja ka tentuar të bëjë puç ndaj Komisionit Parlamentar për Subvencionimin e Teksteve Shkollore, ku Dreshaj është kryesues.
Muja i tha Dreshajt në Facebook se shumica e bën kuorumin dhe çdo sabotim, derisa e akuzoi për ikje nga përgjegjësia.
“Z. Shemsedin Dreshaj e ke detyrim ligjor të paraqitesh në Komision deri në përfundim të sesionit pranveror [31 korrik 2024]. Shumica e bën kuorumin dhe eja puno. Çdo sabotim vendim arbitrar dhe ikje nga përgjegjësia do t’i referohet Seancës, siç e kemi bërë edhe sot”, ka thënë Muja.
Dreshaj është ankuar se në Komisionin për tekstet, opozita e ka zgjedhur një kryesues dhe një nënkryetar, duke u shprehur se nëpërmjet kësaj u tentua fshehja e manipulimit me tekste shkollore. E, Muja ka shtuar se me mungesën e deputetëve opozitarë në këtë komision hetimor, po nënkuptohet që “opozita nuk e ka ditur çfarë po kërkon”.
“Si përfundim, unë nuk e di pse opozita po saboton Komisionin hetimor që është themeluar me kërkesë të tyre. Të gjitha provat dhe dëshmitarët e tyre janë dëgjuar. Në përmbushje të mandatit, planit të punës dhe planit kohor të intervistimit, shumica do të paraqitet çdo ditë deri në përfundim të sesionit pranveror të Kuvendit [31 korrik 2024]. Është përshtypje imja, lehtësisht e verifikuar nga [mos] prezenca e deputetëve në Komision, që opozita nuk ka ditur çfarë po kërkon me këtë komision hetimor, në mungesë të ideve, kanë filluar të sabotojnë me mos prezencë. Ne kemi marrë këtë mandat nga Kuvendi, e kemi për detyrë të jemi prezent dhe të paraqesim raport para Seancës së Kuvendit”, ka theksuar Muja.
