Arkeologët kanë nisur gërmimet në lokalitetin arkeologjik në Cernicë të Gjilanit, duke premtuar zbulime të reja dhe të rëndësishme.
Ministri Hajrulla Çeku përmes një postimi në Facebook thotë se Gradina e Cernicës e cila po konsiderohet një nga vendbanimet e periudhës së hekurit dhe asaj helenistike, që përfshinë periudhën e Mbretërisë Dardane, është tani në qendër të vëmendjes.
Çeku ka theksuar se arkeologjia po trajtohet me prioritet në Kosovë.
“Gradina e Cernicës, bazuar në materialin e zbuluar arkeologjik, përfaqëson njërin nga vendbanimet kryesore të periudhës së hekurit dhe asaj helenistike – periudha e Mbretërisë Dardane, në territorin e Republikës së Kosovës”, ka shkruar Çeku.
Kjo iniciativë është pjesë e përpjekjeve të vazhdueshme për të eksploruar dhe ruajtur vendbanimet e lashta që dëshmojnë historinë dhe kulturën e pasur të Kosovës.
Gërmimet arkeologjike në Gradina e Cernicës pritet të ofrojnë njohuri të reja dhe të zgjojnë interes të madh si për komunitetin shkencor ashtu edhe për publikun e gjerë.
Gërmimet në Cernicë janë vetëm vazhdimi i një serie projektesh që synojnë të ndriçojnë më tej historinë e lashtë të Kosovës.
