Agron Gashi, i dyshuar për vrasjen e rёndё nё tentativë e cila ndodhi mbrëmë në Pejë, ku mbetën të plagosur tre persona, është arrestuar sot në mesditë nga policia.
Ndaj tij, brenda afateve ligjore, Prokuroria e Pejës pritet të kërkojë caktimin e masës së sigurisë.
Zëdhënësi i Prokurorisë Themelore në Pejë, Shkodran Nikçi, ka dhënë detaje mbi të kaluarën kriminale të këtij të dyshuari, duke thënë se i njëjti ka pasur aktakuzë për rrezikim të trafikut publik dhe ka një kallëzim penal për kansoje ndaj prokurorit, Ersan Qavolli.
“Ka qenë i akuzuar për rrezikim të trafikut publik, e ka shkelë një polic dhe ka ikur nga vendi ngjarjes. Ka qenë në arrati një kohë, është arrestu, ka qenë në paraburgim. Njëkohësisht, ky e ka edhe një kallëzim penal për kanosje ndaj prokurorit Ersan Qavolli, në atë periudhë kur ka qenë për rrezikim të trafikut publik”, ka deklaruar Nikçi.
Në ndërkohë, njëri prej të plagosurve në Pejë është në gjendje më kritike, përderisa dy të tjerët janë në gjendje më stabile.
I plagosuri në gjendje kritike është duke u trajtuar në Mjekimin Intensiv në Qendrën Klinike Universitare të Kosovës (QKUK).
Një nga të plagosurit nga të shtënat me armë në Pejë është pjesëtar i Forcës së Sigurisë së Kosovës.
Kështu ka njoftuar Ibrahim Shala, zëdhënës i Ministrisë së Mbrojtjes.
Ndryshe, tre persona janë plagosur me armë zjarri mbrëmë rreth orës 21:25 në Pejë.
Të plagosurit u transferuan nga Spitali i Pejës në QKUK në gjendje të rëndë/ rtvd
