Aleksandar Vulin, që është pjesë e listës së zezë të Shteteve të Bashkuara të Amerikës, është propozuar për zëvendëskryeministër në Serbi.
Mandatari për kryeministër të Serbisë, Millosh Vuçeviq, ka propozuar përbërjen e qeverisë së re të martën, raporton “B92”.
Vuçeviq si kryeministër ka propozuar në postin e zëvendëskryeministrit Aleksandar Vulinin e sanksionuar nga SHBA-ja. Ministër i Jashtëm dhe zëvendëskryeministër është propozuar Marko Gjuriq.
Ministër i Mbrojtjes është propozuar Bratislav Gashiq. Ministër i Brendshëm është propozuar Ivica Daçiq.
Vulin vitin e kaluar u fut në listën e zezë nga Thesari i SHBA-së, për përfshirje në afera korruptive për “të shtyrë përpara agjendat e tij politike dhe interesat e tij personale në kurriz të paqes dhe stabilitetit në Ballkanin Perëndimor”.
Vulin njihet për lidhje të forta me Rusinë. Në të kaluarën ka shërbyer edhe si kryetar i BIA-s serbe e ishte larguar pas sanksionimit nga SHBA-ja.
Edhe ministri i Jashtëm, Gjuriq së fundmi është raportuar se ka takuar udhëheqësin e grupit terrorist të sulmit në Banjskë, Millan Radoiçiq.
Edhe Nenad Popoviq, i propozuar si ministër pa portofol, është pjesë e listës së zezë të SHBA-së për shkak të lidhjeve me Rusinë.
