Ministrja e Punëve të Jashtme dhe e Diasporës, Donika Gërvalla, ka deklaruar se presidenti serb, Aleksandar Vuçiq, ka nisur t’i jetësojë kërcënimet e tij pas votimit të djeshëm për anëtarësim të Kosovës në Këshill të Evropës.
Ajo ka thënë para mediave se bllokimi i qytetarëve në kufirin Kroaci-Serbi është pjesë “e këtij jetësimi”.
“Jemi ballafaqur me një situatë, e një veprim i tillë bazohet në ngjarjet e djeshme. Vuçiqi ka kërcënuar edhe Kosovën e edhe partnerët tanë, që vota pozitive në Këshill të Evropës do të ketë pasoja. Dje nuk eci propaganda, Vuçiqi ka nisur t’i jetësojë kërcënimet e tij. Në këtë kontekst e shoh ndalimin…Janë shkelur masivisht të drejtat e qytetatëve”, ka thënë Gërvalla.
Sipas saj, një pjesë e qytetarëve kosovarë iu nënshtruan bisedave informative.
“…Një numër i tyre u është nënshtruar bisedave informative, ka pasur qëllim që të flitet për 1999-n, për Ushtrinë Çlirimtare të Kosovës”, ka shtuar ministrja e Jashtme.
Për procesin e anëtarësimit të Kosovës në KiE, Gërvalla ka theksuar se më meritorët në këtë janë presidentja Vjosa Osmani, kryeparlamentari Glauk Konjufca dhe zëvendësministri i MPJD-së, Kreshnik Ahmeti.
Gërvalla ka theksuar se një numër “goxha” i lartë zyrtarësh policorë ishin arrestuar e më pas janë liruar.
“Sa i përket arrestimit të zyrtarëve të ndryshëm policorë, numri është goxha i madh, nuk janë kufizuar në pak zyrtarë policorë. Nuk do doja të spekuloj sepse nuk dua ta shqetësoj publikun tonë dhe s’dua të jap informacione gjysmë të verifikuara. E dimë se një pjesë e madhe e tyre tashmë janë liruar”.
Ajo është shprehur se reagimi i ndërkombëtarëve për ndalimin e qytetarëve në kufi është i pari pas shumë kohësh ku Serbisë i është kërkuar përgjegjësi.
“Kemi biseduar me partnerët tanë, i mbajmë të informuar. Ka pasur një reagim të BE-së ku pas kaq kohësh BE nuk flet më për përgjegjësi të të dyja palëve, por kur qartë e thotë se kjo përbën shkelje të marrëveshjes së mobilitetit dhe kërkon nga Serbia të ndalë aktet e tilla”, ka thënë ajo.
