Kryetari i sindikatës së minatorëve të Trepçës në Stantërg, Ibrahim Januzi, ka njoftuar se është ndalur greva dyorëshe e minatorëve pas një marrëveshjeje me menaxhmentin e kësaj ndërmarrjeje.
Sipas Januzit, nëse nuk përmbushen kërkesat, protestat dhe grevat do të vazhdojnë. Ai ka treguar për kushtet, të cilat i kanë pranuar për ndërprerjen e grevës, pas një takimi me kryeshefin e Trepçës, Bashkim Kurti.
“Minatorët në ndërrimin e parë rreth 2 orë kanë protestuar për mosrealizmin e pagës, mirëpo pas ftesës së kryeshefit për të ardhur për të dhënë sqarime dhe informata të hollësishme, është arritur të dakordohen mes minatorëve dhe kryeshefi. 40 për qind e pagës veçse është realizuar edhe 30 për qind, del sot eventualisht nesër dhe deri në javën e ardhshme të përmbyllen të gjitha obligimet ndaj minatorëve”, ka thënë ai për kp.
Ndërrimi i parë i minatorëve në ndërmarrjen Trepça kanë bojkotuar punën të enjten për shkak që ende nuk i kanë marrë pagat e plota.
