Agjencia e Ushqimit dhe Veterinarisë i ka ndaluar që nga data 2 prill (E Martë) eksportin e produkteve të mishit kompanisë “Apetiti” e cila dyshohet se ka eksportuar mish të Brazilit në Shqipëri duke e shitur në treg si mish me prejardhje nga Kosova.
Ky vendim vjen pas publikimit të një hulumtimi nga emisioni “Stop” në TV Klan-Shqipëri , gazetarët e të cilit ishin futur me kamera të fshehta në kompaninë “Apetiti” duke sigururar dëshmi se si ndërroheshin tiketat e mishit të Brazilit duke i vendosur ato të Kosovës.
Para dy ditësh Ministri i Bujqësisë Faton Peci kishte reaguar rreth këtij skandali duke thënë se inspektori i AUV që dyshuhet që është i përfshirë në këtë skandal është suspenduar nga puna dhe kompanisë në fjalë i është ndaluar eksporti i mishit.
Por ka dy ditë që kryeredaktori i “Albanian Post” Lirim Mehmetaj media kjo në pronësi të Baton Haxhiut është duke e akuzuar drejpërdrejt ministrin Peci se është i përfshirë në këtë skandal.
Gazetari Mehmetaj në disa reagime në facebook dhe nëpër emisione televizive insiston se Ministria e Bujqësisë nuk ia ka ndaluar eksportin e mishit kompanisë “Apetiti”.
Por KosovaNews ka siguruar një shkresë të lëshuar në mëngjesin e 2 Prillit nga Arsim Arifi Udhëheqës i Sektorit Veterinar në AUV drejtuar zyrtarëve përgjegjës të këtij institucioni.
Në këtë shkresë pas përshkrimit të raportit thuhet se:
“Deri ne verifikimin e të dhënave , Subjektit te cekur me lart të ju NDALOHET lëshimi i certifikatave për eksport, Po ashtu sipas kerkeses edhe te drejtorit ekzekutiv të dorëzohen te gjitha Iëndët e certifikatave të eksportit për periudhen Janar-Mars 2024”
Vendimi i AUV për ndalimin e eksportit të mishit nga kompania “Apetit” është i theksuar me ngjyrë të kuqe dhe është duke u zbatuar me përpikmëri në të gjitha pikat kufitare të Republikës së Kosovës.
